नेपालब्रिटेन डट कम्
लण्डन – गैरआवासीय नेपाली संघ (एनआरएनए) स्पेनको समन्वयमा नेपाली दूतावास, म्याड्रिडबाट बार्सिलोना पुगेको घुम्ती टोलीले ३१८ जनालाई विभिन्न सेवाहरू प्रदान गरेको छ।
एनआरएनए स्पेनका महासचिव सुन्दर रानाभाटका अनुसार, घुम्ती टोलीले १६ र १७ नोभेम्बर २०२४ मा बार्सिलोनास्थित एनआरएनए कार्यालयमा दुई दिनको शिविर सञ्चालन गरी राहदानी नवीकरण, ट्राभल डकुमेन्ट, र कन्सुलर सेवाहरू उपलब्ध गराएको थियो।
यो पहल स्पेनभरि रहेका नेपाली समुदायका लागि विशेष रूपमा महत्त्वपूर्ण भएको बताइएको छ। यसले दूरदराजमा रहेका नेपाली नागरिकलाई सहज र छिटो सेवासुविधा उपलब्ध गराउन ठूलो सहयोग पुर्याएको छ।
शिविर सञ्चालनका लागि नेपाली दूतावासको टोली कार्यवाहक राजदूत यज्ञराज पौड्यालको नेतृत्वमा बार्सिलोना पुगेको थियो। टोलीमा राष्ट्रसेवक कर्मचारीहरू विपिन चन्द, दिनेश राउत, र लक्ष्मण शर्मा सहभागी थिए। उनीहरूको निरन्तर प्रयासले सेवाग्राहीहरूलाई गुणस्तरीय सेवा प्रदान गर्न सहयोग पुर्यायो।
एनआरएनए स्पेनले एक विज्ञप्ति जारी गर्दै शिविर सफलतापूर्वक सम्पन्न गराउन योगदान पुर्याउने सम्पूर्ण टोलीप्रति आभार प्रकट गरेको छ। विज्ञप्तिमा विशेष रूपमा कार्यवाहक राजदूत पौड्याल र उनको टोलीलाई धन्यवाद दिँदै यो प्रयासले नेपाली समुदायको समस्याहरू समाधान गर्न महत्वपूर्ण भूमिका खेलेको उल्लेख गरिएको छ।
शिविर सञ्चालनमा एनआरएनएका विभिन्न सदस्यहरूले महत्वपूर्ण भूमिका खेले। चिन्तामणि सापकोटा, दिनेश कुमार गिरि, सालिकराम डुम्रे, गंगा प्रसाद भुसाल, यज्ञ नारायण पौडेल, प्रदीप वाग्ले, र सूर्य प्रसाद श्रेष्ठले शिविर व्यवस्थापन र सेवाग्राहीहरूको समस्याको समाधानमा उल्लेखनीय योगदान गरे।
घुम्ती सेवामा सहभागीहरूले राहदानी नवीकरणदेखि लिएर ट्राभल डकुमेन्ट र अन्य कन्सुलर सेवा सहजै प्राप्त गर्न सके। बार्सिलोनामा यस किसिमको सेवा पहिलोपटक नभए पनि यसपटकको शिविरमा सहभागिता र व्यवस्थापन उत्कृष्ट भएको सेवाग्राहीहरूले बताए।
