नेपालब्रिटेन संवाददाता
लण्डन । रसुवाको भोटेकोशी नदीमा आएको बाढीका कारण ज्यान गुमाएकाहरूको सम्झना तथा घाइतेहरूको शीघ्र स्वास्थ्यलाभको कामना गर्दै बेलायतमा दीपप्रज्वलन गरिएको छ।
नेपाली कल्चर सेन्टर यूकेको आयोजनामा सोमबार साँझ हन्स्लोस्थित लक्ष्मीनारायण मन्दिरमा आयोजित श्रद्धाञ्जली कार्यक्रममा बाढीबाट प्रभावित परिवारका सदस्यसहित पश्चिम लण्डनमा बसोबास गर्ने नेपाली समुदायको उल्लेख्य सहभागिता रहेको थियो।
कार्यक्रममा बाढीमा परी ज्यान गुमाएकाहरूको सम्झनामा एक मिनेट मौनधारण गरिएको थियो। त्यसपछि पण्डितद्वय चिरञ्जीवी ढकाल र गोविन्द नेपालले संयुक्त रूपमा स्वस्तिवाचन तथा महामृत्युञ्जय मन्त्र पाठ गरेका थिए।
नेपाली कल्चर सेन्टर यूकेका संयोजक चिरन शर्माको संयोजनमा सम्पन्न कार्यक्रममा गैरआवासीय नेपाली संघ (एनआरएनए) यूकेका अध्यक्ष राजेन्द्र पुडासैनीले विपद्को समयमा सबै नेपाली एकजुट भएर प्रभावितहरूको सहयोगमा उभिनुपर्ने बताए।
पुडासैनीले आफ्नै परिवारका नौ जना सदस्य बेपत्ता रहेको जानकारी दिँदै बाढीपीडितका लागि राहत तथा सहयोग संकलन गर्न सबैलाई आह्वान गरे।
कार्यक्रममा पश्चिम लण्डनस्थित रिभर एकेडेमीमा अध्ययनरत छात्रा टिया आचार्यले नेपालमा हालै आएको बाढीका कारण भएको धनजनको क्षतिप्रति आफू निकै दुःखी भएको बताउँदै देशलाई अप्ठ्यारो परेको बेला सबै जना एकजुट भएर सहयोग गर्न आग्रह गरिन्।
कार्यक्रममा हन्स्लो काउन्सिलका पूर्वमेयर विष्णुबहादुर गुरुङले नेपालमा पटक–पटक आइरहने प्राकृतिक विपत्तिले देशको विकासमा गम्भीर असर पुर्याउँदै आएको बताए। महाभूकम्प र कोरोना महामारीका समयमा नेपाली समुदायले देखाएको एकता र सहयोगको भावना पुनः प्रदर्शन गर्ने बेला आएको उनको भनाइ थियो।
कानूनविद् कमल कँडेलले सञ्चालन गरेको कार्यक्रममा लण्डनमा विभिन्न पेसा तथा व्यवसायमा संलग्न नेपाली समुदायका अगुवाहरूको सहभागिता थियो। कार्यक्रममा स्काई न्युज, अलजजिरा, प्रेस एसोसिएसनलगायत अन्तर्राष्ट्रिय सञ्चारमाध्यमका प्रतिनिधिहरूको समेत उपस्थिति रहेको थियो।
कार्यक्रममा सहभागीहरूले बाढीमा परी ज्यान गुमाएकाहरूको आत्माको चिरशान्तिको कामना गर्दै घाइतेहरूको शीघ्र स्वास्थ्यलाभको प्रार्थना गरेका थिए। साथै, राष्ट्रिय शोकको यस घडीमा एकजुट भएर विपद्मा परेका परिवारलाई सहयोग गर्न नेपाली समुदायलाई आग्रह गरिएको थियो।
