५ श्रावण २०८१, शनिबार
Follow Us

नायिका निता १४ वर्षे किशोरी बनिन्

sarusaru
२३ माघ २०७४, मंगलवार ०६:०३

अभिनेता सरोज खनाल र अभिनेत्री नीता ढुंगाना स्टारर फिल्म ‘पञ्चायत’ को अफिसियल ट्रेलर लञ्च भएको छ । आइतवार राजधानीमा आयोजित एक कार्यक्रमका बीच सार्वजनिक गरिएको फिल्मको ट्रेलरमा नीतालाई १४ वर्षे किशोरी र सरोजलाई ‘गाउँका निम्ति भगवानभन्दा ठूला मान्छे’ भन्दै प्रस्तुत गरिएको छ ।

५० बर्ष अगाडिको सामाजिक संरचना र त्यो समयका किशोरीहरुको यौन मनोविज्ञानलाई समाजले हेर्ने दृष्टिकोण र छाउपडी प्रथामा बस्ने किशोरीको पीडालाई ‘पञ्चायत’ मा देखाइएको लेखक तथा निर्देशक शिवम अधिकारीले जानकारी दिए ।

यो फिल्ममा सरोज र नीताका अलवा रुपा राना, गीता अधिकारी, गणेश गिरी, जाहान्वी बस्नेत, विशाल पहारी, किरण थापा, राजुबाबु श्रेष्ठ लगायतको अभिनय रहेको छ ।

ट्रेलर रिलिज कार्यक्रममा बोल्दै नायिका नीताले ‘मसान’ पछि आफ्ना लागि यो फिल्म आशातित रहेको बताइन् । उनले भनिन्, ‘फिल्ममा मैले १४ वर्षे एक यूवतीको भूमिका निर्वाहा गरेकी छु । स्क्रिप्ट पढ्दा मैले यो भूमिका गर्न सक्छु जस्तो लागेको थिएन तर निर्देशकको मिहिनेतले त्यो सम्भव भयो ।’ यस्तै, अभिनेता खनालले ‘पञ्चायत’ आफ्नो लागि विशेष रहेको सुनाए ।

सञ्चारकर्मी रवि अधिकारी कार्यकारी निर्माता रहेको फिल्मलाई गणेश गिरीको प्रस्तुतीमा सुशान्त श्रेष्ठ र शंकर सुवेदीले निर्माण गरेका हुन् । टंक बुढाथोकीको संगीत र रामेश्वर कार्कीको छायांकन रहेको फिल्मलाई विपिन मल्लले सम्पादन गरेका हुन् ।

यसअघि अमेरिकाको क्यालिफोर्निया राज्यको सन् फ्रान्सिस्को शहरमा आयोजित ‘सन् फ्रान्सिस्को चलचित्र महोत्सव’मा ‘पञ्चायत’ले बिदेशी भाषाको ‘उत्कृष्ट चलचित्र’ विधामा र ‘उत्कृष्ट मुख्य अभिनेत्री’ विधामा पुरस्कार जित्न सफल भएको थियो । यो फिल्म चैत २ गतेबाट अलनेपाल रिलिज हुँदैछ ।
– फिल्मी खबरबाट ।