काठमाडौं । गैरआवासीय नेपाली संघ (एनआरएनए) को आगामी कार्यकाल (२०२३–०२५) को लागि अध्यक्ष पदमा उम्मेद्वारी दिन कतार निवासी राजेन्द्र कुमार (आर.के.) शर्माले औपचारिक घोषणा सभा गर्ने तयारी गरेका छन् ।

संघका वर्तमान उपाध्यक्ष समेत रहेका शर्माले आफ्नो कर्मभूमि कतारको राजधानी दोहामा एक विशेष समारोहका बीच संघको आगामी कार्यकालका लागि नेतृत्व गर्न विशेष कार्ययोजना सहित केही दिनभित्र चुनावी घोषणा सभा गर्न लागेका हुन् । शर्माले घोषणा सभामा कार्ययोजनाहरु समेटेर बाचापत्र सार्वजनिक गर्न लागेका छन् ।

कतारमा औपचारिक घोषणा सभा गर्नुअघि शर्माले आफ्नो पक्षमा समर्थन जुटाउन जापान, दक्षिण कोरिया, हङकङ, अमेरिका र क्यानडाको भ्रमण गरेका थिए । गैरआवासीय नेपालीको अभियानमा सक्रिय भूमिका खेलेका अग्रज तथा अभियन्ताहरुसँग सल्लाह सुझाव लिन उनी भ्रमणमा निस्केका थिए ।

एक साता भन्दा लामो भ्रमण सकेर उनी अहिले कतार फर्किसकेका छन् । विभिन्न देशको भ्रमणमा रहँदा शर्मालाई अन्य सामाजिक संघ संस्थाका प्रतिनिधिहरुले स्वागत गरेका थिए ।
एसिया र अमेरिका क्षेत्रको भ्रमणपछि शर्माले उत्साहित हुँदै आफ्नो पक्षमा राम्रो माहोल बनेको र आफ्नो जित सुनिश्चित हुने दाबी गरे । उनले भने, “एनआरएनए अभियन्ता र डेलिगेट्सहरु सबैसँग भेटघाट र छलफल भएको छ । उहाँहरु मेरो उम्मेदवारीप्रति सकारात्मक हुनुहुन्छ ।”

शर्माले केही दिनभित्रमा आफ्नो स्पष्ट कार्ययोजना सहित अध्यक्ष पदमा औपचारिक रूपले उम्मेदवारी दिने घोषणा गर्न लागेको बताएका छन् । शर्माले विश्वका सबै क्षेत्रमा बस्ने गैरआवासीय नेपालीहरूको सल्लाह र सुझावको आधारमा आफ्ना योजना कार्यक्रमहरू सार्वजनिक गर्ने बताए ।

उनले संघले अब गर्नुपर्ने काम तथा योजनाहरुको बारेमा सल्लाह सुझाव पेश गर्न आव्हान गरेका छन् । शर्माले आफूलाई सल्लाह सुझाव दिन +९७४५११३६६९९ नम्बरमा फोन तथा ह्वाट्स एप गर्न र [email protected] मा ईमेल पठाउन अनुरोध गरेका छन् ।

सबै गैरआवासीय नेपालीहरुबाट सल्लाह सुझाव लिएपछि २ वर्षे कार्यकालमा अध्यक्षमा निर्वाचित भएपछि गरिने कार्यहरुको योजना शर्माले घोषणा सभामा आफ्नो बाचापत्र भनेर सार्वजनिक गर्ने छन् । एनआरएनएको ११ औं महाधिवेशन आगामी अक्टोबर १७ तारिखदेखि नेपालमा सुरु हुँदैछ ।