लण्डन । गैरआवासी नेपाली संघको पराजित समूह लगायत केही संघसँस्थाले बिभिन्न व्यक्तिका नाममा गैरकानुनी रुपमा भूकम्प पिडितको नाममा आर्थिक संकलन गर्न थाले पछि नेपाल प्रहरीले सचेत गराएको छ ।

नेपाल प्रहरीले भूकम्प प्रभावितको नाममा अवाञ्छित गतिविधि र ठगी हुन सक्ने भएकाले निश्चित गरेर मात्रै सहयोग गर्न आम नागरिकमा अनुरोध गरेको हो ।

भूकम्प पीडितहरूलाई इन्टरनेट वा अन्य माध्यमबाट आर्थिक वा अन्य सहयोग गर्दा सहयोग माग्ने व्यक्ति वा सङ्घसंस्था आधिकारिक हो वा होइन निश्चित गरेर मात्र सहयोग गर्न अनुरोध गरिएको प्रहरी प्रवक्ता प्रहरी नायब महानिरीक्षक कुवेर कडायतले बताए।

प्रवक्ता कडायतका अनुसार विगतमा यसरी सहयोगका नाममा ठगिएका र वास्तविक प्रभावितहरूले राहत नपाएका जानकारी आएको भन्दै त्यसतर्फ सचेत हुन भनिएको हो। प्रहरीले शनिबार सार्वजनिक सूचना नै जारी गरेर सबैमा उक्त अनुरोध गरेको हो।

विभिन्न सरकारी निकाय तथा सङ्घसंस्थाले भूकम्प प्रभावित क्षेत्रमा सहयोगको घोषणा गरेका छन्। जाजरकोट केन्द्रविन्दु भएर आज गएको ६ दशमलव ४ रेक्टर स्केलको भूकम्पमा परी अहिलेसम्म एक सय ५७ जनाको मृत्यु भइसकेको छ। झण्डै दुई सय जना घाइते भएका छन्। खोज र उद्धार कार्य अहिले पनि जारी रहेको छ।