२६ बैशाख २०८१, बुधबार
Follow Us

अब ४ वर्ष म पनि राजनीति गर्छु: दीपक मनाङे

नेपालब्रिटेन संवाददाता
५ चैत्र २०८०, सोमबार १४:१७

गण्डकी प्रदेशका भौतिक पूर्वाधारमन्त्री दीपक मनाङेले अब आफूले वास्तविक राजनीति गर्ने दाबी गरेका छन । आज सोमबार पद तथा गोपनीयताको शपथ लिएपछि पत्रकारहरुसँग कुरा गर्दै उनले यस्तो बताएका हुन ।

उनले एक वर्षसम्म आफू आराम गरेर बसेको र अबको चार वर्ष राजनीति गर्ने दाबी गरेका छन । उनले भने, ‘एक वर्षसम्म म यसो फुटबल सुटबल खेलेर हिँडिरहेको थिएँ, रेस्टजस्तो । हिजो चाहिँ मलाई के जोश आयो भने यो ४ वर्ष मैले पनि राजनीति गर्नुपर्छ’ । उनले यसअघि आफूले सामाजिक काम गरेको पनि बताएका छन । उनले भने, ‘अब रियल पोलिटिक्समा आउँदैछु ।’

उनले केन्द्रमा जे समस्या आएर गठबन्धन फेरिए पनि त्यसको असर प्रदेशमा पर्न नहुने दाबी गरेका छन । उनले आफू अहिले सरकारमा नजाँदा गण्डकी प्रदेशमा मध्यावधि निर्वाचनको सम्भावना रहेको भन्दै चुनावमा जाँदा खर्च धेरै हुने बताएका छन । उनले भने, ‘मध्यावधिमा म जानै दिन्न, गएछ भने पनि मैले लड्दिन ।’

भौतिक पूर्वाधार मन्त्रालय नै किन रोजेको भन्ने पत्रकारको प्रश्नमा उनले सरकारको ७० प्रतिशत भन्दा बढी बजेट यसमै रहेको र भ्रष्टाचार पनि धेरै हुने भएकाले नियन्त्रण गर्न गएको जवाफ दिए ।