काठमाडौं । सत्तारुढ दल नेकपा एमालेले सचिवालय बैठक बोलाएको छ । एमाले प्रचार विभाग प्रमुख राजेन्द्र गौतमका अनुसार बैठक शनिवार बिहान ११ बजे ललितपुरको च्यासलस्थित पार्टी केन्द्रीय कार्यालयमा बस्न लागेको हो ।

पार्टी अध्यक्ष एवं प्रधानमन्त्री केपी शर्मा ओलीको अध्यक्षतामा हुने उक्त बैठकमा समसामयिक राजनीति, सरकार सञ्चालन गर्न गठित समन्वय सयन्त्र, उपनिर्वाचनलगायत विषयमा छलफल हुने बताइएको छ ।

रास्वपाले बोलायो केन्द्रीय समिति बैठक
राष्ट्रिय स्वतन्त्र पार्टी (रास्वपा) ले केन्द्रीय समितिको बैठक बोलाएको छ । कात्तिक २४ गते शनिबार बिहान साढे ११ बजे पार्टी केन्द्रीय कार्यालय बनस्थलीमा बस्न लागेको कार्यबाहक प्रवक्ता मनिष झाले जानकारी दिए ।

झाका अनिसार बैठकमा आगामी मंसिर १६ गते हुने स्थानीय तह उपनिर्वाचन, सभापति रवि लामिछाने पक्राउ परेको विरोधमा जारी आन्दोलनको समीक्षा, समसामयिक राजनीतिक गतिविधि र पार्टीको सांगठनिक गतिविधिलगायत विषयमा छलफल हुने कार्यसूची छ ।