लण्डन । प्रवासी नेपाली मंच यूकेले आफ्नो २० औं स्थापना दिवस मनाउने तयारी गरेको छ।

मंचका अध्यक्ष तुंग भुसालका अनुसार, आगामी ५ जनवरी, आइतवार, लन्डनमा एक भव्य समारोह आयोजना गरेर स्थापना दिवस मनाइने भएको हो।

“सवल प्रवासी: समृद्ध नेपाल, सुखी नेपाली” मुल नारासहित मनाइने २० औं वार्षिकोत्सव कार्यक्रममा संस्थापक अध्यक्ष आंग काल्जंग लामालाई विशेष सम्मान र स्मरण गरिनेछ। प्रवासी नेपाली मंचले परोपकार, नेपाली समुदायको अधिकार र लोकतन्त्रको पक्षमा अडिग रहेर काम गर्दै आएको छ।

कार्यक्रममा बेलायतस्थित नेपाली समुदायका अगुवाहरूको उपस्थिति रहने अपेक्षा गरिएको छ। कार्यक्रमको सम्पूर्ण तयारी पुरा भएको जानकारी कार्यक्रम संयोजक कृष्ण भण्डारीले दिए।