रुस तालिबानको सत्तालाई मान्यता दिने पहिलो देश बनेको छ। अफगानिस्तानका विदेश मन्त्री आमिर खान मुत्ताकीले यसलाई “साहसी निर्णय” भनेर प्रशंसा गरेका छन्।

बिहीबार उनले अफगानिस्तानस्थित रुसी राजदूत दिमित्री झिर्नोभसँग काबुलमा भेट गरेका थिए, जहाँ झिर्नोभले आफ्नो सरकारको निर्णय — इस्लामिक अमीरात अफ अफगानिस्तानलाई मान्यता दिने — औपचारिक रूपमा जानकारी गराएका थिए।

मुत्ताकीले भने, “यो सकारात्मक सम्बन्ध, आपसी सम्मान, र रचनात्मक संलग्नताको नयाँ चरण हो,” र थपे, “यो परिवर्तन अन्य देशहरूका लागि पनि एउटा उदाहरण बन्न सक्छ।”

सन् २०२१ को अगस्टमा पुनः सत्तामा फर्किएयता, तालिबानले अन्तर्राष्ट्रिय मान्यता र लगानीको खोजी गर्दै आएका छन्, यद्यपि त्यही समयदेखि मानव अधिकार उल्लंघनसम्बन्धी रिपोर्टहरू बढ्दै गएका छन्।

रुसको विदेश मन्त्रालयले एक विज्ञप्तिमा भनेको छ,”इस्लामिक अमीरात अफ अफगानिस्तान सरकारलाई औपचारिक मान्यता दिने कदमले हाम्रो दुई देशबीचको फलदायी द्विपक्षीय सहकार्यलाई गति दिने विश्वास गरेका छौं।”

विज्ञप्तिमा रुसले ऊर्जा, यातायात, कृषि र पूर्वाधार जस्ता क्षेत्रहरूमा “व्यापारिक तथा आर्थिक” सहकार्यको सम्भावना देखेको उल्लेख गरिएको छ। साथै, आतंकवाद र लागूपदार्थ तस्करीविरुद्धको लडाइँमा काबुललाई सघाउन जारी राख्ने पनि जनाएको छ।

यसले देखाउँछ कि रुस तालिबानसँगको सम्बन्धलाई केवल कूटनीतिक मान्यतामा सीमित नराखी, आर्थिक तथा सुरक्षात्मक सहकार्यमा पनि विस्तार गर्न चाहन्छ।

बीबीसी