नेपालब्रिटेन संवाददाता
सय भन्दा बढी राहत वितरण गर्ने संस्था तथा अधिकारवादी समूहले गाजामा देखिएको कुपोषण र भोकमरीको समस्यामा चासो व्यक्त गरेका छन् ।
भोकभोकै सर्वसाधारण मरेको देख्नु परेको भन्दै उनीहरुले तत्काल केही उपाय लगाउन उनीहरुले दवाव दिएका हुन् । मेडिकल सान्स फ्रन्टायर, सेभ द चिल्ड्रेन र अक्सफाम लगायतले अवस्था गम्भीर भएको उनीहरुको भनाइ छ ।
अन्तर्राष्ट्रिय सञ्चार माध्यमका अनुसार यो क्षेत्रमा पुग्ने सबै राहत नियन्त्रणमा राख्ने इजरायलले भने हमासको प्रोपोगान्डालाई सहयोग पुग्ने ध्येयले सो विज्ञप्ति जारी गरिएको आरोप लगाएको छ । हमास नियन्त्रित स्वास्थ्य मन्त्रालयले गएको २४ घण्टामा थप १० जना कुपोषणका कारण मरेको समाचार सार्वजनिक गरेको छ ।
यो विवरण सार्वजनिक भएपछि ती संस्थाहरूको तर्फबाट विज्ञप्ति आएको हो । मन्त्रालयका अनुसार आइतबार यता त्यसरी मर्नेको संख्या ४३ पुगेको छ । संयुक्त राष्ट्र सङ्घका अनुसार गाजामा अस्पतालमा खाना नपाएर अन्तिम अवस्थामा पुगेकाको उपचार भइरहेको छ । धेरै जना बाटोमा ढल्न थालेका छन । त्यस क्षेत्रमा इजरायलले ल्याएको समस्याका कारण राहत वितरण गर्न गएको आफ्नै संस्थाका धेरै मानिसको ज्यान जाने गरेको छ ।
दुई महिना लामो युद्ध विरामको समाप्तिपछि गएको मार्च महिनादेखि इजरायलले गाजामा राहत वितरणमा रोक लगाएको छ । इजरायलले बाँकी रहेका बन्दी रिहा गर्न हमासलाई दबाब दिनका लागि यसरी राहत वितरणमा अवरोध गरिएको उसको भनाइ छ ।
विश्व स्वास्थ्य सङ्गठनले एक चौथाइ जनसङ्ख्याले कठिन अवस्थाको सामना गरिरहेको तथा एक लाख भन्दा बढी महिला तथा बालबालिका कुपोषणका कारण एकदमै जोखिमपूर्ण अवस्थामा रहेको जनाएको समाचारमा उल्लेख छ ।
