काठमाडौं । एनएसजेएफ पल्सर स्पोर्टस अवार्डको २२औं संस्करण आगामी भदौ २९ गते पोखरामा हुने भएको छ ।

नेपाल खेलकुद पत्रकार मञ्च (एनएसजेएफ) ले शुक्रबार काठमाडौंमा पत्रकार सम्मेलन गर्दै २२औं संस्करणको मिति र स्थान सार्वजनिक गरेको हो । पोखरामा हुने स्पोर्टस अवार्डमा २०८१ सालभर नेपाली खेलकुदलाई उच्च स्थानमा पुर्याउने खेलाडी, प्रशिक्षक र खेलकर्मीलाई सम्मान गरिने मञ्चले जनाएको छ ।

स्पोर्टस अवार्डको २२ औं संस्करणमा १० विधा समावेश गरिएको छ । जसमा वर्षका उत्कृष्ट खेलाडी पुरुष, महिला र युवाका साथै वर्षका उत्कृष्ट प्रशिक्षक, पिपल्स च्वाइस अवार्ड, पारा एथलिट सम्मान, स्पेसल अवार्ड, टिम अफ दी एयर, लाइफटाइम एचिभमेन्ट अवार्ड, एसियन स्पोट्र्स जर्नालिस्ट अवार्ड विधामा पुरस्कार प्रदान गरिने छ ।

वर्षका उत्कृष्ट खेलाडी पुरुष, महिला, युवा विधा र पिपल्स च्वाइस अवार्ड बिजेतालाई पल्सर मोटरसाइकल प्रदान गरिने र अन्य विधाका विजेता तथा सम्मानीत व्यक्तिलाई एक लाख रुपैया नगद प्रदान गरिने मञ्चले जनाएको छ ।

वर्ष खेलाडी पुरुष, महिला, युवा र प्रशिक्षक, पिपल्स च्वाइसको मनोनयन केही दिनमै सार्वजनिक गर्ने पनि मञ्चको भनाइ छ । यसैबीच मञ्चले पल्सर स्पोट्र्स अवार्डका लागि गोल्छा ग्रुपको पल्सर मोटरसाईकलसँग पाँच वर्षको सम्झौता पनि नविकरण गरेको छ ।