नेपालब्रिटेन संवाददाता
काठमाडौँ । सञ्चार तथा सूचना प्रविधिमन्त्री जगदिश खरेलसहित मन्त्रालयका कर्मचारी, राष्ट्रिय सभाको विधायन व्यवस्थापन समितिका सदस्यले शुक्रबार नेपाली फिल्म ‘परान’ हेर्नुभएको छ ।
दीपक आचार्य निर्देशित चलचित्र ‘परान’ को विशेष प्रदर्शनसहित ‘नेपाली चलचित्रको वर्तमान अवस्था तथा चलचित्र क्षेत्रमा गर्नुपर्ने सुधार सम्बन्ध’ आयोजित छलफल कार्यक्रममा मन्त्री खरेलले परान ‘सासले होइन साथले चल्छ’ भन्ने चलचित्रको नाराले आमाबाबुको वास्तविक भावना झल्काउने बताउनुभयो ।
उहाँले चलचित्र कथा, पटकथा उत्कृष्ट रहेको र पात्रहरू मार्फत व्यक्त गरिएका संवादहरूले दर्शकहरूलाई गहिरो रूपमा छुने धारणा व्यक्त गर्नुभयो । उहाँले ३४ वर्षअघि ७६ वर्षीय बुबासँग रञ्जना हलमा चलचित्र ‘कोसेली’ हेरेपछि, अहिले फेरि उहाँसँगै परान हेर्न आएको स्मरण गर्नुभयो । उहाँले २०२६ सालमा बनेको ऐनले अहिलेसम्म चलचित्र बनाउने काम निर्दिष्टि गरिरहेको धारणा व्यक्त गर्नुभयो ।
राष्ट्रिय सभाको विधायन समितिमा यतिबेला प्रस्तावित चलचित्र विधेयकमाथि दफावार छलफल चलिरहँदा विभागीय मन्त्रीसहित समितिका सदस्यहरूले फिल्म हेर्नुभएको हो । सञ्चारमन्त्रीसहितको टोलीले टिकट काटेर फिल्म परान हेर्नुभएको हो । सञ्चारमन्त्री खरेलले नेपाली फिल्मलाई प्रोत्साहन गर्न आफूहरू पैसा तिरेर फिल्म हेर्न आएको भन्दै आवश्यक परेको खण्डमा अन्य जनराका फिल्म पनि हेर्ने बताउनुभयो ।
सञ्चारमन्त्री खरेलले सरकारले चलचित्र क्षेत्रलाई सहजीकरण गर्नुपर्ने बताउनुभयो । उहाँले नेपाली चलचित्रलाई राष्ट्रिय उद्योगको रुपमा विकास गर्न जरुरी रहेको औंल्याउनुभयो ।
विधायन व्यवस्थापन समितिका सभापति तुलसा कुमारी दाहालले चलचित्रले नेपाली माटो र नेपाली पारिवारिक कथाहरूको सारलाई सुन्दर ढङ्गले समेटेको बताउनुभयो । उहाँले चलचित्र विधेयकमाथि छलफल जारी रहेको र सरकारले चलचित्र उद्योगको विकास गर्न प्रयास गरिरहेको जानकारी दिनुभयो ।
कार्यक्रममा चलचित्र निर्देशक दीपक आचार्यले सञ्चारमन्त्री आफैंले चलचित्र हेरेर नेपाली चलचित्र क्षेत्रमा उत्साह जगाएको बताउनुभयो । उहाँले समाज रुपान्तरणका लागि नेपाली चलचित्रको महत्त्वपूर्ण भूमिका हुने उल्लेख गर्नुभयो ।
ठमेलस्थित क्यूएफएक्स सिनेमाको छायाँ सेन्टरमा परानको विशेष प्रदर्शन तथा चलचित्र क्षेत्रमा गर्नुपर्ने सुधारबारेको छलफलमा सञ्चार मन्त्रालय, रष्ट्रियसभा विद्यमान व्यवस्था समितिबिच छलफल कार्यक्रम आयोजना गरियो । सञ्चारमन्त्रीखरेलसहित मन्त्रालयका सचिव राधिका अर्याल, राष्ट्रिय सभा विधान व्यवस्थापन समितिका अध्यक्ष तुलसा कुमारी दाहाल, वरिष्ठ अभिनेता मदनकृष्ण श्रेष्ठलगायत विशेष प्रदर्शनीमा उपस्थिति रहेको थियो ।
