नेपालब्रिटेन संवाददाता
वासिङ्टन — सम्भावित इरानी क्षेप्यास्त्र आक्रमणको खतरा देखिएपछि अमेरिकी राष्ट्रपति डोनाल्ड ट्रम्पलाई गत महिना निकै गोप्य ढंगले एउटा विमानबाट अर्को विमानमा सारिएको अमेरिकी सञ्चारमाध्यमहरूले जनाएका छन्।
द वासिङ्टन पोस्टका अनुसार ट्रम्प टेलिभिजन क्यामेराको प्रत्यक्ष नजरमा एयर फोर्स वनमा चढेका थिए। तर त्यसपछि उनलाई क्याटरिङका लागि प्रयोग हुने ट्रकको आडमा अर्को सैन्य विमानमा सारिएको थियो। विमानमा रहेका केही पत्रकार तथा ह्वाइट हाउसका कर्मचारीलाई समेत ट्रम्पलाई गोप्य रूपमा अर्को विमानमा सारिएको जानकारी थिएन।
अमेरिकी साझेदार सीबीएस न्युजलाई अधिकारीहरूले दिएको जानकारीअनुसार अमेरिकी गुप्तचर निकायले इरानबाट विमानमा क्षेप्यास्त्र प्रहार हुन सक्ने विश्वसनीय खतरा पत्ता लगाएको थियो। यद्यपि, ह्वाइट हाउसले अहिलेसम्म विमान परिवर्तन गरिएको उक्त गोप्य कारबाहीको औपचारिक पुष्टि गरेको छैन।
यसअघि अंकारामा भएको शिखर सम्मेलनका क्रममा ट्रम्पले आफू इरानको “नम्बर एक लक्ष्य” भएको बताएका थिए।
यो गोप्य सैन्य रणनीति अमेरिकाले इरानमाथि पुनः सैन्य आक्रमण सुरु गरेको भोलिपल्ट अपनाइएको बताइएको छ। वासिङ्टन र तेहरानबीच युद्ध अन्त्य गर्ने उद्देश्यले भइरहेको वार्ता निष्कर्षविहीन भएपछि अमेरिकाले इरानमाथि पुनः हवाई तथा सैन्य कारबाही अघि बढाएको थियो।
ट्रम्प टर्की पुग्दा कतारले उपलब्ध गराएको नयाँ बोइङ ७४७–८ विमान प्रयोग गरेका थिए। तर फर्किने क्रममा उनले आफू पुरानो एयर फोर्स वनमै “पुरानो समयको सम्झनाका लागि” जाने बताएका थिए।
समाचारअनुसार सार्वजनिक रूपमा देखाइएको विमान र गोप्य रूपमा प्रयोग गरिएको सैन्य विमानबीचको यो परिवर्तन अमेरिकी राष्ट्रपतिको सुरक्षालाई ध्यानमा राखेर गरिएको उच्चस्तरीय सुरक्षा उपाय थियो।
