नेपालब्रिटेन संवाददाता
काठमाडौँ । सरकारले काठमाडौँ महानगरपालिकाको प्रमुख प्रशासकीय अधिकृत फेरेको छ । बुधवार बसेको मन्त्रिपरिषद् बैठकले काठमाडौँ महानगरपालिकाका प्रमुख प्रशासकीय अधिकृत बसन्त अधिकारीलाई मधेसी आयोगमा सरुवा गर्दै राष्ट्रिय योजना आयोगका सहसचिव प्रदीप परियारलाई महानगरको प्रमुख प्रशासकीय अधिकृतमा नियुक्त गरेको हो ।
काठमाडौँ महानगरको कार्यपालिकाको निर्णय प्रमाणीकरण र कार्यान्वयनमा भएको अनियमितताको विषयमा अधिकारीको नाम जोडिएको थियो । उनको नाम जोडिएपछि मेयर बालेन साहले उनलाई बिदामा बस्न भनेका थिए । अन्ततः अधिकारीको सरुवा आयोगमा भएको हो ।
युवा तथा कान्छा सहसचिव परियारका लागि यो निकै राम्रो अवसर पनि हो भने त्यतिकै चुनौती पनि छ । सङ्घीय राजधानीस्थित ठुलो महानगरमा मेयर साहको योजना अनुरूप सबैलाई मिलाएर अघि बढ्नु पर्ने चुनौती छ । यद्यपि मेयर साहकै रोजाईमा उनी त्यहाँ गएकोले लय मिलाउन सके उतिकै सहज पनि छ ।
यसअघि नै परियारको नाम महानगरका लागि आएको थियो । परियारका लागि मात्रै हैन सबै युवा सहसचिवको क्षमता प्रमाणित गर्ने अवसरका रूपमा हेरेका छन् सहकर्मीहरूले ।
