नेपालब्रिटेन संवाददाता
काठमाडौं । सहकारी संस्थाको बचत रकम दुरुपयोग सम्बन्धमा छानबिन गर्न गठित संसदीय विशेष समितिको प्रतिवेदन सार्पजनिक भएको छ । संघीय संसद सचिवालयले शुक्रबार आफ्नो वेबसाइटमार्फत प्रतिवेदन सार्वजनिक गरेको हो ।
समितिले गत सोमबार प्रतिनिधिसभा बैठकमा प्रतिवेदन पस्तुत गरेको थियो । मन्त्रिपरिषदको बुधबारको बैठकले सम्वद्ध मन्त्रालयहरुको समन्वयमा प्रतिवेदन कार्यान्वयन गर्ने निर्णय गरिसकेको छ ।
सहकारीमा भएको रकम अपचलनको विषय उठाएर तत्कालीन प्रतिपक्षी काँग्रेसले पटकपटक संसद अवरुद्ध गरेपछि गत १५ जेठमा प्रतिनिधिसभाले एमाले सांसद सूर्यबहादुर थापा सभापति रहेको ७ सदस्यीय छानबिन समिति गठन गरेको थियो ।
समितिले ९९ दिन लगाएर प्रतिवेदन तयार पारेको हो । समितिले ६६ वटा बैठक गरेको र विभिन्न ४ सय ५१ जना व्यक्तिहरूसँग सुझावमूलक जानकारी, अन्तरक्रिया गरेको थियो ।
थापाले सहकारी ठगीको आरोपित ४७ जना सहकारी सञ्चालक, गोर्खा मिडिया नेटवर्क प्रालिका सञ्चालक तथा कर्मचारीसमेत ३ जना र नियामक निकायका ५ जना गरी ५५ जनासँग सोधपुछ गरिएको जानकारी दिए ।
प्रतिवेदनले जितेन्द्रबाबु (जिबी) राईले विभिन्न पाँचवटा सहकारीबाट कानूनविपरीत ६५ करोडभन्दा बढी रकम गोर्खा मिडिया नेटवर्कमा ल्याएको भेटिएको औंल्याएको छ । राईसहित गोर्खा मिडिया नेटवर्क अन्तर्गत सञ्चालित ग्यालेक्सी टेलिभिजनका चार जनामाथि कारबाही सिफारिस गरेको छ ।
छानबिन समितिले सूर्यदर्शन, सुप्रिम, स्वर्णलक्ष्मी, सहारा र सानोपाइला सहकारीबाट गैरकानूनी रुपमा गोर्खा मिडियामा रकम प्रवाह भएको बताएको छ ।
सहकारी छानबिन समितिको पूर्ण प्रतिवेदन पढ्नका लागि यहाँ क्लिक गर्नुहोस् ।
