नेपालब्रिटेन संवाददाता
पत्रकार महासंघको भिजिट भिसा प्रकरणमा नयाँ मोड
लण्डन । नेपाल पत्रकार महासंघकी अध्यक्ष निर्मला शर्मा वेलायत आउनु अघि नै नेपाल प्रेस युनियन यूकेका अध्यक्ष विपिन निरौलामाथि स्पष्टिकरण माग गरिएको छ।
नेपाल पत्रकार महासंघ यूके शाखाको तर्फबाट बिमला सेने र खेमराज रानाभाटले शुक्रवार पठाएको पत्रमार्फत अध्यक्ष निरौलालाई तीन दिनभित्र स्पष्टिकरण पेश गर्न भनिएको हो।
पत्रमा भनिएको छ, “तपाईंले आफूलाई पूर्वअध्यक्ष भनी भ्रम सिर्जना गर्दै नागरिक न्यूज र उकेरा डटकममा नेपाल पत्रकार महासंघ यूकेको नाम जोडेर भिजिट भिसासम्बन्धी निराधार, कपोलकल्पित र तथ्यहीन समाचार प्रवाह गर्नुभएकोमा महासंघ यूके शाखाले गम्भीर आपत्ति जनाएको छ।”
त्यसैगरी, “तपाईं कहिल्यै अध्यक्ष नहुनुभएको स्पष्ट प्रमाण हुँदाहुँदै यसरी भ्रम फैलाउनु अनैतिक र आपत्तिजनक छ,” पत्रमा उल्लेख गरिएको छ। साथै, “शाखा तथा कार्यसमितिको नाम जोडेर सार्वजनिक रूपमा गम्भीर आरोप लगाउँदा कुनै सम्पर्क नगर्नु पत्रकार आचारसंहिताविपरीत हो,” भनिएको छ।
पत्र अनुसार, २० जुलाई २०२५ मा बसेको महासंघ यूके शाखाको बैठकले तीन दिनभित्र लिखित रूपमा प्रमाणसहित स्पष्टिकरण दिन अनुरोध गरेको थियो। तर ३० जुलाईसम्म कुनै प्रतिक्रिया नआएको जनाइएको छ।
“आज ३१ जुलाई २०२५ का दिन बसेको कार्यसमितिको बैठकले तपाईंलाई पुनः तीन दिनको म्याद थप गरिएको जानकारी गराउँछ,” पत्रमा उल्लेख गरिएको छ। साथै, “उक्त समयसीमा भित्र सन्तोषजनक स्पष्टिकरण नआएमा तपाईंको सदस्यता सम्बन्धी आवश्यक प्रक्रिया अघि बढाइनेछ,” भन्ने चेतावनी समेत दिइएको छ।
अध्यक्ष शर्मा आजै लण्डन आउदैछन् ।
