नेपालब्रिटेन संवाददाता
काठमाडौँ। नेपाली काँग्रेसले पार्टी सदस्यता व्यवस्थापन तथा अद्यावधिक प्रक्रियालाई समयमै सम्पन्न गर्न वडा तहलाई स्पष्ट जिम्मेवारी तोक्दै समयसीमा भित्र काम नगरे कडा संगठनात्मक कदम चालिने संकेत गरेको छ।
पार्टीका कार्यवाहक मुख्यसचिव कृष्णप्रसाद दुलालले देशभरका ६ हजार ७४३ वडा कार्यसमितिलाई पत्राचार गर्दै क्रियाशील सदस्यता अद्यावधिक कार्य निर्धारित समयभित्र सम्पन्न गर्न निर्देशन दिएका छन्। उनले उक्त कार्य आगामी जेठ २१ गतेभित्र पूरा गर्नुपर्ने स्पष्ट समयसीमा समेत तोकेका छन्।
निर्देशनअनुसार वडा सभापतिहरूले मोबाइलमा उपलब्ध एप स्टोर तथा गुगल प्ले स्टोरमार्फत नेपाली काँग्रेसको आधिकारिक मोबाइल एप डाउनलोड गरी लगइन गरेर सदस्यता अद्यावधिक प्रक्रिया सम्पन्न गर्नुपर्ने व्यवस्था गरिएको छ।
साथै, तोकिएको समयसीमा भित्र कार्य सम्पन्न नगर्ने वा प्रक्रियामा असहयोग गर्ने वडा सभापतिहरूको हकमा विधानअनुसार वैकल्पिक व्यवस्थाको प्रक्रिया अघि बढाइने चेतावनी पनि दिइएको छ।
त्यसैगरी, असहयोग गर्ने वडा सभापतिहरूको विवरण सम्बन्धित पालिका कार्यसमितिले संकलन गरी केन्द्रीय कार्यालयमा पठाउनुपर्ने व्यवस्था समेत पत्रमार्फत स्पष्ट पारिएको छ।
