नेपालब्रिटेन संवाददाता
काठमाडौं। राष्ट्रिय स्वतन्त्र पार्टीका सभापति रवि लामिछाने आगामी जुन १ देखि भारत भ्रमणमा जाने भएका छन्। उनी तीन दिनका लागि नयाँ दिल्ली जाने कार्यक्रम रहेको विभिन्न सञ्चारमाध्यमहरूले जनाएका छन्।
त्यस्तै, प्रधानमन्त्री बलेन्द्र शाहको भारत भ्रमणको मिति अझै तय नभएकाले कूटनीतिक वृत्तमा अन्योल कायमै रहेको छ। केही रिपोर्टहरूमा प्रधानमन्त्री शाह यस वर्ष भारत नजान सक्ने सम्भावना समेत औंल्याइएको छ।
काठमाडौं पोस्टका अनुसार लामिछानेलाई भारत सरकारको तर्फबाट औपचारिक निमन्त्रणा पठाइएको छ। भ्रमणका क्रममा उनी नयाँ दिल्लीमा उच्चस्तरीय भेटघाटमा सहभागी हुने सम्भावना रहेको छ।
समाचार स्रोतहरूका अनुसार लामिछानेले भारतीय प्रधानमन्त्री नरेन्द्र मोदी, विदेशमन्त्री एस जयशंकर, राष्ट्रिय सुरक्षा सल्लाहकार अजित डोभाल लगायत भारतीय जनता पार्टी का वरिष्ठ नेताहरूसँग भेटवार्ता गर्न सक्ने अनुमान गरिएको छ।
यद्यपि, नेपाल सरकार वा भारत सरकार दुवै पक्षबाट हालसम्म उक्त भ्रमणको औपचारिक घोषणा भने गरिएको छैन। यो भ्रमण यस्तो समयमा हुन लागेको छ, जब नेपाल–भारत सम्बन्धमा केही तनावको संकेत देखिएको छ।
विश्लेषकहरूका अनुसार यो भ्रमण नेपाल–भारत सम्बन्धको वर्तमान अवस्थालाई ध्यानमा राख्दै “कूटनीतिक संकेत” का रूपमा समेत हेरिएको छ।
