नेपालब्रिटेन संवाददाता
विश्वकप फुटबलको अन्तिम १६ चरण सुरु हुँदै गर्दा शनिबार फिलाडेल्फियामा हुने खेलमा फ्रान्सले पाराग्वेविरुद्ध खेल्दा अत्यधिक गर्मीको सामना गर्नुपर्ने भएको छ ।
स्थानीय समयअनुसार साँझ ५ बजे लिङ्कन फाइनान्सियल फिल्डमा हुने खेलमा तापक्रम करिब ३८ डिग्री सेल्सियससम्म पुग्ने अनुमान अमेरिकी राष्ट्रिय मौसम सेवाले गरेको छ । भीषण गर्मीको चेतावनीका बीच प्रतियोगितामा खेलाडीहरूको शारीरिक अवस्था प्रमुख चुनौतीका रूपमा देखिएको छ ।
फ्रान्सका प्रशिक्षक डिडियर डेसच्याम्प्सले मौसम सबै टोलीका लागि समान चुनौती हुने बताए । ‘यो कुरा हामीले ध्यानमा राख्नुपर्छ, तर सबै टोलीका लागि अवस्था उस्तै हो’, उनले भने । फ्रान्सले चार खेलमा १३ गोल गर्दै प्रतियोगितामा उत्कृष्ट प्रदर्शन गरिरहेको छ ।
पाराग्वेका प्रशिक्षक गुस्ताभो अल्फारोले फ्रान्सलाई ‘विद्युतीय आँधी’ को सङ्ज्ञा दिँदै यसको आक्रामक क्षमतालाई मुख्य खतराका रुपमा टिप्पणी गरे । उनले गर्मीको चुनौतीलाई स्वीकार गरे पनि आफ्नो टोली त्यसमा अभ्यस्त रहेको दाबी गरे ।
पाराग्वेले अन्तिम ३२ चरणमा जर्मनीमाथि जित निकाल्दै अन्तिम १६ मा स्थान बनाएको हो । शनिबारकै अर्को खेलमा क्यानडाले ह्युस्टनमा २०२२ विश्वकप सेमिफाइनलिस्ट मोरक्कोसँग प्रतिस्पर्धा गर्नेछ । दक्षिण अफ्रिकालाई पराजित गर्दै अन्तिम १६ मा पुगेको क्यानडा उच्च आत्मविश्वासमा रहेको छ ।
क्यानडाका प्रशिक्षक जेसी मार्सले मोरक्कोलाई ‘कमजोरीविहीन टोली’ भन्दै उच्चस्तरीय प्रदर्शन आवश्यकपर्ने बताए । यता मोरक्कोका प्रशिक्षक मोहम्मद ओहाबीले नेदरल्यान्ड्सविरुद्धको जितलाई विगतको कुरा भन्दै अब प्रत्येक खेल नयाँ चुनौती भएको बताएका छन् ।
मोरक्को र क्यानडाबीचको भिडन्तलाई यस चरणको महत्वपूर्ण खेलका रूपमा हेरिएको छ, जसको विजेताले क्वाटरफाइनल प्रवेशको नजिक पुग्नेछ ।
