नेपालब्रिटेन संवाददाता
काठमाडौं। मिस नेपाल–२०२६ को प्रतिष्ठित उपाधि दीपमाला ढकालले जितेकी छन् । ललितपुरको पुलचोकस्थित द प्लाजामा शनिवार आयोजित ग्राण्ड फिनालेमा उनले प्रतिस्पर्धीहरूलाई पछि पार्दै ‘मिस नेपाल वर्ल्ड–२०२६’ को ताज आफ्नो नाममा लेखाएकी हुन् ।
देशकै सबैभन्दा प्रतिष्ठित सौन्दर्य प्रतियोगिता मानिने मिस नेपालमा यस वर्ष देश–विदेशबाट छनोट भएका २४ जना फाइनलिस्टबीच कडा प्रतिस्पर्धा भएको थियो । अन्तिम चरणमा आत्मविश्वास, व्यक्तित्व, बौद्धिक क्षमता, प्रस्तुति, सामाजिक दृष्टिकोण तथा मञ्च प्रदर्शनका आधारमा निर्णायक मण्डलले दीपमालालाई विजेता घोषणा गरेको हो ।
मिस नेपाल–२०२६ को ताजसँगै दीपमालाले अब अन्तर्राष्ट्रिय मिस वर्ल्ड प्रतियोगितामा नेपालको प्रतिनिधित्व गर्नेछिन् । आयोजक संस्था द हिडन ट्रेजरका अनुसार विजेताले आगामी महिनाहरूमा विभिन्न सामाजिक अभियान, नेतृत्व विकास तथा अन्तर्राष्ट्रिय प्रतियोगिताको तयारीसम्बन्धी विशेष प्रशिक्षण प्राप्त गर्नेछिन् ।
दीपमाला यसअघि मिस नेपाल हङकङ–२०२६ को उपाधिसमेत जितेर नेपालमा आयोजित मिस नेपाल प्रतियोगितामा सहभागी भएकी थिइन् । हङकङमा हुर्किएकी ढकाल उच्च शिक्षा पूरा गरेपछि व्यावसायिक क्षेत्रमा पनि सक्रिय रहँदै आएकी छन् ।
२४ वर्षीय दीपमाला आफ्नी आमाबाट प्रेरणा पाएको बताउँछिन् । उनकी आमाले सन् १९९४ मा आयोजित पहिलो मिस नेपाल प्रतियोगितामा प्रतिस्पर्धा गरेकी थिइन् । प्रसिद्ध लगानी व्यवस्थापन कम्पनी ब्ल्याकरकमा लगानी रणनीतिकारका रूपमा कार्यरत छन् । यसबाहेक उनी तेक्वान्दोकी ब्ल्याक बेल्ट खेलाडी, म्याराथन धावक पनि हुन् । उनले अर्थशास्त्रमा स्नातक गरेकी छिन् ।
कार्यक्रममा सौन्दर्यसँगै उद्देश्य, नेतृत्व, सामाजिक उत्तरदायित्व र व्यक्तित्व विकासलाई प्राथमिकता दिँदै विभिन्न चरणका प्रतिस्पर्धा सम्पन्न गरिएको थियो । देशका कला, संस्कृति र प्रतिभालाई अन्तर्राष्ट्रिय मञ्चमा प्रवर्द्धन गर्ने उद्देश्यसहित आयोजना गरिएको प्रतियोगिताले यस वर्ष पनि व्यापक आकर्षण बटुलेको आयोजकले जनाएको छ ।
