नेपालब्रिटेन संवाददाता
काठमाडौँ । सत्तारुढ एमालेका प्रमुख सचेतक महेश बर्तौलाले काठमाडौँ महानगरपालिकाका मेयर बालेन्द्र साह (बालेन)ले राज्यको विद्यमान कानुनी प्रबन्धहरूलाई चुनौती दिने व्यवहार गरिरहेको बताएका छन् । मुलुकको नेतृत्व गरिरहेका र गरेका नेताहरूविरुद्ध अमर्यादित अभिव्यक्ति दिएको पनि बर्तौलाले दाबी गरेका छन् ।
संघीय संसद् परिसरमा मंगलबार एमालेका प्रमुख सचेतक बर्तौलाले मेयर साहका पछिल्लो अभिव्यक्ति पदीय मर्यादा अनुकूल नभएको बताए । एमाले अध्यक्ष एवं पूर्वप्रधानमन्त्री केपी शर्मा ओलीमाथि निम्छरो, अशिष्ट र उद्दण्डताका साथ मेयर शाहले अभिव्यक्ति दिएको बर्तौलाको भनाइ थियो ।
‘यो असाध्यै गलत ढंगलबाट विषयवस्तु आयो । महानगरपालिकाका मेयरले जुन ढङ्गबाट असाध्यै तल्लो स्तरबाट टिप्पणीहरू जसरी गरिरहनु भएको छ त्यो राम्रो होइन । उहाँ स्वयंले त्यो संस्थाको गरिमालाई गिज्याइरहनु भएको छ । मेयरजस्तो सम्मानित, मर्यादित पदलाई उहाँले गरेका टिप्पणीहरूले असाध्यै होचो बनाइरहेको छ, उहाँले सोच्नुपर्छ । एउटा युवा धेरै जनताले आशा पनि गरेको अवस्था हो उहाँप्रति ।
त्यसकारण त्यो भरोसा र आशा जागेर मेयरको त्यति महत्त्वपूर्ण गरिमामय जिम्मेवारीमा हुनुहुन्छ, ‘बर्तौलाले भने, ‘यो देशको नेतृत्वप्रति, पूर्वप्रधानमन्त्रीप्रति जुन ढङ्गबाट सधैँ निम्छरो तरिकाले अशिष्ट, उद्दण्ड तरिकाका साथ जे प्रस्तुति गरिरहनु भएको छ यो राम्रो छैन । यसले इतिहासलाई अवमूल्यन गर्ने, नेतृत्वमाथि गालीगलौज गर्ने, कहिले सिंहदरबार जलाइदिन्छु भन्ने, कहिले के भन्ने । यस प्रकार राज्यका विद्यमान कानुनी प्रबन्धलाई नै चुनौती दिने गरी एक जना मेयरले जे हर्कत गरिरहेको राम्रो होइन ।’
