लण्डन – नेपालब्रिटेन डट कमको १७ औं वार्षिकोत्सवमा भाग लिन आएका गैरआवासीय नेपाली संघका अध्यक्ष डा. बद्री केसी मंगलवार मस्को फर्किएका छन्।

गत अगस्ट २४ तारिख बेलायत आएका डा. केसीले ७ दिनको बेलायत बसाईको क्रममा ९ वटा कार्यक्रममा सहभागी भए।

उनले लण्डन, मिडल्याण्ड, स्कटल्याण्ड, लिभरपुल, डार्टफोर्ड, र अल्डरसटमा आयोजित कार्यक्रमहरूमा सहभागी भई गैरआवासीय नेपालीहरूसँग अन्तरक्रिया गरेका थिए।

बेलायतमा उनले गैरआवासीय नेपाली नागरिकता, नेपालमा लगानी, भूपू गोर्खा, गैरआवासीय नेपाली अभियान लगायतका विषयमा अन्तरक्रिया गरेका थिए।

डा. केसीको विदाइका लागि गैरआवासीय नेपाली संघका सल्लाहकार तथा नेपालब्रिटेन डट कमका अध्यक्ष चिरञ्जीवी ढकालको टोली लण्डनस्थित हिथ्रो विमानस्थल पुगेको थियो।

गैरआवासीय नेपाली संघका उपाध्यक्ष रामशरण सिमखडाले डा. केसीको बेलायत भ्रमण ऐतिहासिक र पूर्ण रूपमा सफल रहेको प्रतिक्रिया दिएका छन्।