नेपालब्रिटेन संवाददाता
काठमाडौं । सत्तारुढ नेकपाको स्थायी समिति बैठक डेढ महिनापछि आज बस्दैछ । आन्तरिक किचलो र प्रधानमन्त्री केपी ओलीको राजीनामाको माग पछि स्थगित बैठक आजवाट पुन सुरु हुन लागेको हो ।
आजको स्थायी समितिको वैठकले पार्टीलाई अतीतमुखी कचिङ्गलबाट मुक्त गर्ने प्रधानमन्त्रीका प्रेस सल्लाहकार सूर्य थापाले उल्लेख गरेका छन् । उनले ट्विट गर्दै भनेका छन् ‘गुटबन्दी र गणितीय चलखेलबाट मुक्त भएर पार्टी एकीकरण सहमति र अग्रगतिका साथ भविष्यमुखी बन्न अग्रसर हुनुको अर्को विकल्प पनि त छैन ।’
पार्टीका अध्यक्षद्वय केपी ओली र पुष्पकमल दाहालको अध्ययनका लागि तयार पारिएको प्रस्ताव हिजो नै स्थायी समिति सदस्यलाई उपलब्ध गराइएको छ । उता नेकपाका वरिष्ठ नेता माधवकुमार नेपालले पार्टीभित्रको अन्तरसंघर्ष समाधानका लागि लागि दुई अध्यक्षले तयार पारेको प्रस्तावमा सहमति जनाएको छ ।
अध्यक्षद्वयको प्रस्तावमा पार्टी एकताको महत्वलाई आत्मसात् गर्ने, पार्टीमा पद्धति र संस्थागत प्रणालीलाई सबल तुल्याउने, अध्यक्षद्वयको कार्यविभाजन तथा कार्याधिकार स्पष्टगर्ने, पार्टी एकताका बाँकी काम सम्पन्न गर्नुपर्ने उल्लेख छन् ।
त्यस्तै एकताको राष्ट्रि«य महाधिवेशन आयोजना गर्ने, सरकारको काम, संसदीय दलको भूमिका, प्रदेश सरकार र स्थानीय तहको भूमिका प्रभावकारी बनाउने प्रस्ताव गरिएको छ । नेपालको सीमा समस्या र समाधान सम्बन्ध, कोरोना महामारीको रोकथाम, नियन्त्रण र मिलेनियम च्यालेन्ज कम्प्याक्ट सम्झौताका सम्बन्धलगायतका विषयमा स्थायी समितिको बैठकको छलफलको प्रस्तावमा समेटिएको छ । मन्त्रिपरिषद् पुनर्गठन लगायतका विषय पनि छलफलका एजेण्डामा छन् ।
