केन्यामा १२ नेपाली चेलीहरुको मानवतस्करी गर्ने क्यानडियन व्यापारीलाई ३० वर्ष जेल

लण्डन । अफ्रीकाको केन्याको नृत्यालयमा १२ नेपाली चेलीहरुको मानवतस्कर गरेको आरोपमा क्यानडाका व्यापारीलाई ३० वर्ष कैद सजाय सुनाईएको छ । दर्जनौ नेपाली चेलीहरुलाई अबैध रुपमा नृत्यालयमा पुर्याउने क्यानडाका व्यापारी आसिफ अमिराली अलीभाई जेठालाई मोम्बासाको अदालतले मानव बेचबिखनको आरोपमा ३० वर्षको जेल सजाय सुनाएको हो ।

जेठालाई नेपाली मूलका १२ महिला बेचबिखन, मानव बेचबिखनलाई प्रोत्साहन गर्ने र यात्रा कागजातमा हस्तक्षेप गर्ने गरी तीनवटा अपराधमा दोषी ठहर गरिएको छ ।

शान्जु कानुन अदालतका वरिष्ठ निवासी मजिस्ट्रेट डेभिड ओधियाम्बोले अभियुक्तलाई पहिलो, दोस्रो र तेस्रो मुद्दामा क्रमशः ३०, २० र १० वर्षको जेल सजाय सुनाएको छ । सजायहरू एकैसाथ चल्नेछन्।

जेठालाई एक लाख देखि १० लाख शिलिङ्ग सम्मको जरिवाना, आपराधिक आम्दानीको कब्जामा लिएको, श्रम स्वीकृति नलिई व्यापार गरेको र अवैध रूपमा विदेशीलाई काममा लगाएको अभियोगमा दण्ड लगाईएको छ ।

जेठाले नेपाली युवतीहरूलाई धोका दिएर शोषण गर्ने नियतले कब्जामा लिएको अदालतले सुनाएको छ । सन् २०१९ मा मोम्बासाको न्यालीस्थित अमके प्लाजामा रहेको जेठाको रंगीला ग्रिल एण्ड बारमा ट्रान्सनेशनल अर्गनाइज्ड क्राइम युनिट९अन्तरराष्ट्रिय संगठित अपराध इकाइ०का गुप्तचरहरूले छापा मारेर १२ जना केटीहरूलाई उद्धार गरेका थिए।

उनीहरूलाई केन्यामा नर्तकको रूपमा काम गर्न र अत्यधिक महङ्गो मनोरञ्जन गर्नेहरूको मनोरञ्जन गर्न लगाइएको थियो। तीमध्ये दुई युवतीहरु १६ र १७ वर्षका थिए, आठ जना २२ र २६ वर्षका र दुई ३० वर्षभन्दा माथिका थिए भनि एमवाकीलिशी डटकमले समाचार लेखेको छ ।