कुबेतमा बन्धक बनाएर नेपाली महिलामाथि श्रम शोषण

झापा ।वैदेशिक रोजगारीका लागि कुबेत गएकी मेचीनगर नगरपालिका– ८ की २८ वर्षीया सपना ठटालले आफूलाई रोजगारदाताले बन्धक बनाएर श्रम शोषण गरिरहेको जनाउँदै उद्धारका लागि आग्रह गरेकी छन्।

काठमाडौँका नारायण थापा नामका एजेन्टले अल्फा नामक मेनपावर कम्पनीमार्फत मासिक ४० हजार पारिश्रमिक हुने प्रलोभन देखाएर सात महिना अघि कुबेत पुर्याएको सपनाका पति श्यामबहादुर ठटालले बताए।

मध्य कुबेतबाट ३२ किलोमिटर पश्चिमस्थित अल जहार सहरमा घरेलु कामदारका रुपमा पुर्याइएकी सपनाले दश दिनअघि साथीको मोबाइलमार्फत पतिसँग सम्पर्क गरी आफ्नो नाजुक अवस्थाबारे जानकारी गराउँदै जतिसक्दो छिटो उद्धार गरिदिन आग्रह गरेकी हुन्।

‘कुबेत गएको चार महिनादेखि सम्पर्कविहीन अवस्था थियो’, सपनाका पति श्यामबहादुरले भने, ‘१० दिनअघि एक्कासि फोन आयो, साथीको फोनबाट लुकेर सम्पर्क गरेको बताएकी थिइन्, बिनापैसा रात दिन काम लगाउने गरेको र केही बोल्यो भने उल्टै साहुनीले कोठामा थुनेर कुटपिट गर्ने गरेको बताउँदै जतिसक्दो छिटो उद्धार गरिदिनु भनेर भनिन्।’

सपनाजस्तै थुप्रै महिलालाई कोठामा थुनेर राख्ने गरेको र कामका लागि गाडीमा हालेर टाढासम्म पुर्याउने गरेको सपनाका पति श्यामबहादुरले पत्नीको भनाइ उद्धृत गर्दै बताए। मोबाइल खोसेर परिवार र साथीसँग सम्पर्कविहीन बनाएर श्रम शोषण गरिरहेको उनले जानकारी दिए।

कुबेत गएपछि एकपटक ४० हजार पठाएको र त्यसपछि सम्पर्क टुटेको सपनाकी आमा कृष्णमाया परियारले बताइन्। नाताले भाउजू पर्ने पुष्पा दर्जीमार्फत एजेन्ट थापासँग सम्पर्क भएको र पुष्पा पनि हाल कुबेतमै रहेको कृष्णमायाले बताए।

काठमाडौँ घर बताउने एजेन्ट थापाले पीडितलाई उद्धार गरेर नेपाल ल्याउन नौ लाख फिरौती रकम मागेको कृष्णमायाले बताइन्। ‘नौ लाख दिनू, म सपनालाई झिकाइदिन्छु भनेर नारायण थापाले भने’, कृष्णमायाले भनिन्, ‘पुष्पा दर्जीलाई सम्पर्क गर्दा उनले पनि केही मद्दत गर्न नसकिने बताइन्।’

दैनिक ज्यालादारी गरेर गुजारा चलाउँदै आएको आफ्नो परिवारसँग फिरौती रकम बुझाउने कुनै सम्भावना नरहेको उनले गुनासो गरिन्। वैदेशिक रोजगारीमा जान सपनाले बनाएको कागजातअनुसार उनको २०८० भदौ १८ गते कुबेतको भिसा जारी भएको छ भने त्यसको वैधता चार महिना अर्थात् गत पुस १८ सम्म मात्र भएको पाइएको छ।

सपनाको भिसा कागजातअनुसार उनलाई घरेलु कामदारका रुपमा कुबेतको मोदार रियल इस्टेटमा लगिएको देखिन्छ। त्यहाँको ठेगाना अल जहरा ब्लक– ८, सडक– १६० भएको पनि कागजातमा उल्लेख छ।

छोटो अवधिको भिसा बनाएर विदेशमा लैजाने र भिसाको म्याद गुज्रिएपछि अवैध रुपमा काममा लगाएर श्रम शोषण गर्ने गिरोहको फन्दामा पीडित महिला परेको हुन सक्ने आशंका छ। विदेश लैजाँदा लागेको सबै खर्च एजेन्ट थापाले नै व्यहोरेको बताइएको छ।

कुबेतमा बन्धकजस्तै अवस्था भोगिरहेकी सपनाको घरमा दुई छोरा छन्। सानो छोरा १४ महिनाको छ। उनका पति श्यामबहादुर ट्याक्टरमा मजदुरी काम गर्दै आएका छन्। आमा कृष्णमायाले छोरीको सकुशल उद्धार गरी नेपाल ल्याइदिन नेपाल सरकारसँग अनुरोध गरेकी छन्। –रासस