नेपालब्रिटेन संवाददाता
काठमाडौँ । एमालेले पार्टी सदस्यता नवीकरण गरिसकेकी पूर्वराष्ट्रपति विद्यादेवी भण्डारीलाई सक्रिय राजनीतिमा फर्कन रोक्ने निर्णय गरेको छ ।
ललितपुरको च्यासलस्थित पार्टी मुख्यालयमा मध्यराति सकिएको बैठकमा निर्णय सुनाउँदै ओलीले संविधान र गणतन्त्रमाथि प्रश्न उठ्ने गरी पूर्वराष्ट्रपति राजनीतिमा फर्कन नमिल्ने बताए ।
एमालेले भण्डारीलाई अभिभावकका रूपमा रहन भनेको छ । बैठकमा ओलीले पूर्वराष्ट्रपति भण्डारीलाई राजनीतिमा फर्कन दिने कि नदिने भन्नेबारे प्रस्ताव पेस गरेका थिए ।
त्यसपछि बैठकमा बोल्दै ओली सम्वद्ध केन्द्रीय सदस्यहरुले भण्डारीलाई रोक्नुपर्ने बताएका थिए । निर्णय सुनाउँदै ओलीले आफूले राष्ट्रपतिको मर्यादामा बस्न आफूले दिएको सुझाव बेवास्ता मात्र नभई चुनौती दिएको भन्दै ओली भण्डारीप्रति आक्रोशित देखिए । ओली र भण्डारीबीच आइतबार एमाले मुख्यालय च्यासलमा भेटवार्ता भएको थियो ।
पार्टी बैठक जारी रहेकै बेला बुढानीलकण्ठ भंगालस्थित निवासमा सञ्चारकर्मीसँग कुरा गर्दै भण्डारीलाई आफू माझ किरातकी छोरी भन्दै सक्रिय राजनीतिमा फर्कने निधो गरिसकेकाले खुट्टा नकमाउने चेतावनी दिएकी थिइन् । बैठकले उक्त अभिव्यीक्रप्रति पनि आपत्ति जनाएको छ ।
‘अध्यक्षले दिएका सुझाव र त्यसको जवाफको प्रतीक्षामा रहेको अवस्थामा उहाँले पत्रकार सम्मेलन गरेर केन्द्रीय कमिटी बैठकलाई नै चुनौती दिएकाले बैठकले पूर्वराष्ट्रपति विद्यादेवी भण्डारीलाई पार्टीमा नफर्कन, आफ्नो गरिमा अनुरूप पूर्वराष्ट्रपतिको हैसियतमा सल्लाहकार र अभिभावक बनेर बस्न आग्रह गर्ने निर्णय भयो,’ एमाले निर्णयमा छ । यस्तै एमाले निर्णयमा भण्डारको पार्टी सदस्यता नवीकरण नभएको पनि उल्लेख छ ।
ओलीको निर्णयमा उपाध्यक्षद्वय युवराज ज्ञवाली र सुरेन्द्र पाण्डे तथा स्थायी कमिटी सदस्य कर्ण थापाले फरक मत राखेका छन् ।
