काठमाडौं । नेपाली काग्रेसका नेता पूर्व महामन्त्री डा शशाङक कोइरालाले पार्टी सभापतिमात्र निर्वाचनबाट चयन गर्नुपर्ने धारणा राखेका छन् । सभापतिबाहेक अन्य पदहरुमा निर्वाचन गर्दा पार्टी भित्र गुट उपगुट बनेको भन्दै पार्टीलाइ एकताबद्ध बनाउन सभापतिको मात्र निर्वाचन गर्नुपर्ने बताएका हुन् ।

भरतपुरको बागेश्वरी आध्यात्मिक परिषदमा राजनितिज्ञ कैलास कोइरालाको कविता संग्रह ‘प्रेम शङ्कु’ को विमोचन कार्यक्रममा बोल्दै डा. कोइरालाले आगामी महाधिवेशनमा चाहे आफू पार्टी नेतृत्वका लागि तयार रहेको बताए ।

उनले पार्टी संचालनको लागि विपि कोइरालाको पालमा बनेको सभापतिको मात्रै निर्वाचन हुने विधान अनुसार अन्य पद सभापतिले मनोनित गर्ने ब्यवस्था भए पार्टी बलियो हुने आधार प्रस्तुत गरेका थिए।

‘मेरो एउटा खाका छ, यो पार्टीलाई कसरी लिएर जानपर्छ भनेर । विपी कोइरालाले बनाएको विधान अनुसार सभापतिको मात्रै चुनाव हुनुपर्छ । पाँच वर्ष सभापतिले पार्टी चलाउनुपर्छ,’ कोइरालाले भने , ‘अन्य पदमा पनि चुनाव गर्दा गुट उपगुट भयो । उपसभापति , महामन्त्री सभापतिले नियुक्त गर्नपर्छ ।’

उनले सबै पदमा निर्वाचन गर्दा गुटउपगुट जन्मिएको भन्दै सभापतिको मत्रै निर्वाचन गरेर पाँच वर्ष सभापतिले पार्टी हाक्न पाउनुपर्ने बताए ।