नेपालब्रिटेन संवाददाता
स्पेन सरकारले करिब ५ लाख अवैध आप्रवासीलाई कानुनी मान्यता प्रदान गर्ने योजना स्वीकृत गरेको छ। यस निर्णयले ती आप्रवासीहरूलाई औपचारिक रूपमा रोजगारी क्षेत्रमा समावेश हुन सहयोग गर्ने अपेक्षा गरिएको छ।
स्पेनका प्रधानमन्त्री पेद्रो सान्चेजले यस कदमलाई “न्यायको कार्य” मात्र नभई देशको आवश्यकतासमेत भएको बताएका छन्। सामाजिक सञ्जालमार्फत स्पेनी नागरिकलाई सम्बोधन गर्दै उनले करिब आधा मिलियन मानिसहरू पहिले नै देशको दैनिक जीवनको हिस्सा भइसकेको यथार्थलाई स्वीकार गर्न यो निर्णय गरिएको बताएका छन्।
यस योजनाअनुसार अवैध आप्रवासीहरूलाई एक वर्षको नवीकरणयोग्य बसोबास अनुमति दिइनेछ। आवेदन दिनका लागि उनीहरूले स्पेनमा कम्तीमा पाँच महिना बसेको प्रमाण र कुनै आपराधिक रेकर्ड नभएको देखाउनुपर्नेछ। आवेदन अवधि १६ अप्रिलदेखि जुन अन्त्यसम्म रहनेछ।
प्रधानमन्त्री सान्चेजले आप्रवासीहरूले “धनी, खुला र विविध स्पेन निर्माण गर्न” महत्वपूर्ण योगदान पुर्याएको उल्लेख गर्दै वृद्ध हुँदै गएको जनसंख्या भएको देशको अर्थतन्त्र र सार्वजनिक सेवाहरू टिकाउन उनीहरू आवश्यक रहेको बताएका छन्।
तर विपक्षी कन्जर्भेटिभ दल पिपुल्स पार्टी (PP) ले यस योजनाको विरोध गर्दै यसले अवैध आप्रवासनलाई प्रोत्साहन गर्ने र थप मानिसहरूलाई आकर्षित गर्ने दाबी गरेको छ। उनीहरूले योजनालाई रोक्ने प्रयास गर्ने बताएका छन्।
फुन्कास (Funcas) नामक थिंक ट्यांकका अनुसार स्पेनमा करिब ८४०,००० अवैध आप्रवासी छन्, जसमा अधिकांश ल्याटिन अमेरिकी मूलका छन्। विपक्षीले भने यो संख्या गलत रहेको र झन्डै १० लाख मानिसले आवेदन दिन सक्ने बताएका छन्।
यस योजनाबाट लाभान्वित हुने अपेक्षा गरिएको बोलिभियन ग्राफिक डिजाइनर रिकार्डोले भने, “यसले धेरै मानिसलाई रोजगारी र राम्रो जीवनस्तरको अवसर दिनेछ। साथै राज्यलाई पनि राजस्व बढ्नेछ र रोजगारदातालाई कानुनी रूपमा कामदार उपलब्ध हुनेछन्।”
यसबीच क्याथोलिक चर्चले सरकारको योजनालाई समर्थन गरेको छ।
उल्लेखनीय रूपमा, स्पेनका विभिन्न सरकारहरूले विगतमा पनि यस्ता आप्रवासी आममाफी कार्यक्रम ल्याएका थिए। सन् २००५ मा समाजवादी सरकारको समयमा ५७७,००० मानिसले बसोबास अनुमति पाएका थिए।
