नेपालब्रिटेन संवाददाता
लन्डनको उत्तर क्षेत्रमा रहेको गोल्डर्स ग्रीनमा दुई जना यहूदी पुरुषमाथि चक्कु प्रहार गरिएको घटनालाई प्रहरीले आतंकवादी हमला घोषणा गरेको छ।
केयर स्टार्मर नेतृत्वको सरकारले उक्त घटनाप्रति कडा प्रतिक्रिया जनाउँदै यसलाई “अत्यन्तै भयावह” भन्दै निन्दा गरेको छ।
मेट्रोपोलिटन प्रहरीले जनाएअनुसार ७६ वर्ष र ३४ वर्षका दुई पीडितलाई घटनास्थलमै उपचार गरिएको थियो र हाल उनीहरूको अवस्था स्थिर रहेको छ। उनीहरूलाई थप उपचारका लागि अस्पतालमा भर्ना गरिएको छ।
प्रहरीले ४५ वर्षीय एक व्यक्तिलाई, जो सोमालियामा जन्मिएका बेलायती नागरिक हुन्, टेजर प्रयोग गरेर नियन्त्रणमा लिएको थियो। उनलाई हत्या प्रयासको आशंकामा पक्राउ गरिएको छ र हाल प्रहरी हिरासतमा राखिएको छ।
प्रधानमन्त्री स्टार्मरले यसलाई “यहूदी समुदायमाथिको घृणित हमला” भन्दै यस्तो प्रकारका घटनाहरूले सम्पूर्ण बेलायतमाथि नै आक्रमण हुने बताएका छन्। उनले भने, “हाम्रो यहूदी समुदायमाथि हुने आक्रमण भनेको बेलायतमाथिको आक्रमण हो।”
हाल प्रहरीले घटनाबारे थप अनुसन्धान गरिरहेको छ।
