लन्डन। बेलायतको डेभनमा प्रशिक्षणका क्रममा रोयल नेभी (शाही नौसेना) को एक हेलिकप्टर दुर्घटना हुँदा तीन जना नौसैनिकको मृत्यु भएको छ।

स्थानीय समय अनुसार बुधबार बिहान करिब ३:४५ बजे ओक ह्याम्पटन नजिकैको सोरटन डाउनमा ‘मर्लिन एमके४’ (Merlin Mk4) नामको हेलिकप्टर दुर्घटनामा परेको हो। दुर्घटनाको खबरलगत्तै उद्धार टोली र आपतकालीन सेवा घटनास्थल पुगेका थिए।

रोयल नेभीका प्रवक्ताका अनुसार यो दुर्घटना नियमित हेलिकप्टर प्रशिक्षण अभ्यासका क्रममा भएको हो। प्रवक्ताले मृतक सैनिकका परिवारलाई घटनाबारे जानकारी गराइसकिएको र परिवारले थप विवरण सार्वजनिक गर्नुअघि केही समय गोपनीयताको माग गरेको बताएका छन्।

शाही वायु सेना (फ्लीट एयर आर्म) की कोमोडोर-इन-चीफ समेत रहेकी राजकुमारी केट मिडलटन (प्रिन्सेस अफ वेल्स) ले राजकुमार विलियम र आफू पीडित परिवार र साथीभाइहरूको दुःखमा साथै रहेको र उनीहरूलाई आफ्नो हृदयमा राखिरहेको बताएकी छन्।

नौसेना प्रमुख जनरल सर ग्विन जेन्किन्सले दुर्घटनाग्रस्त हेलिकप्टर सोमरसेटको आरएनएएस योभिल्टन (RNAS Yeovilton) मा आधारित रहेको पुष्टि गरे। उनले भने, “यो घटनाले हाम्रो सम्पूर्ण नौसैनिक समुदायलाई स्तब्ध बनाएको छ। यस त्रासदीबाट प्रभावित परिवार, साथीभाइ र प्रियजनहरूप्रति म गहिरो समवेदना व्यक्त गर्दछु।”

बेलायती प्रधानमन्त्री सर कीर स्टारमरले सामाजिक सञ्जाल ‘एक्स’ (X) मार्फत घटनाप्रति दुःख व्यक्त गर्दै यसलाई “अत्यन्तै दुःखद” भनेका छन्। त्यस्तै, रक्षामन्त्री जोन हीलीले पनि तीन जना सैनिकको असामयिक निधनले आफू मर्माहत भएको बताएका छन्।