नेपालब्रिटेन संवाददाता
काठमाडौँ । मंगलबार बसेको मन्त्रिपरिषद् बैठकमा प्रधानमन्त्री वालेन्द्र शाह (बालेन) सहित मन्त्रीहरूलाई दुग्ध विकास संस्थान (डीडीसी) का विभिन्न दुग्धजन्य उत्पादनको प्याकेट वितरण गरिएको छ।
स्वदेशी उत्पादनको प्रवर्द्धन तथा किसानको हितलाई प्राथमिकता दिने उद्देश्यले कृषि, वन तथा वातावरणमन्त्री गीता चौधरीले प्रधानमन्त्रीसहित मन्त्रिपरिषद्का सदस्यहरूलाई डीडीसीका उत्पादन उपलब्ध गराएकी हुन्।
स्रोतका अनुसार वितरण गरिएको प्याकेटमा डीडीसीद्वारा उत्पादित दूध, केशर दूध, बटर, चिज, दही तथा पेँडा समावेश थिए। स्वदेशी वस्तुको उपभोग बढाउने, दुग्ध किसानलाई प्रोत्साहन गर्ने तथा सरकारी स्वामित्वको संस्थानको बजार विस्तारमा टेवा पुर्याउने उद्देश्यले बैठककै क्रममा उक्त उत्पादन वितरण गरिएको बताइएको छ।
मन्त्रिपरिषद् बैठकमा डीडीसीका उत्पादनको देशव्यापी प्रवर्द्धन, बजार विस्तार तथा संस्थानको व्यावसायिक सुदृढीकरणका विषयमा समेत छलफल भएको स्रोतले जनाएको छ।
