नेपालब्रिटेन संवाददाता
न्युयोर्क । बेलायती नम्बर एक टेनिस खेलाडी आर्थर फेरीले विम्बल्डनमा देखाएको उत्कृष्ट प्रदर्शन युएस ओपनमा दोहोर्याउन सकेनन्।
इटालीका १३औँ वरीयता प्राप्त खेलाडी लोरेन्जो मुसेटीसँग सोझो सेटमा पराजित हुँदै २४ वर्षीय फेरीको युएस ओपन यात्रा पहिलो चरणमै टुंगिएको छ।
हालै सम्पन्न घरेलु ग्रान्ड स्लाम विम्बल्डनको सेमिफाइनलसम्म पुगेर विश्व वरीयताको ११४औँ स्थानबाट शीर्ष ४० भित्र उक्लिएका फेरी उच्च आत्मविश्वासका साथ न्युयोर्क पुगेका थिए। तर, विश्व वरीयताको ३३ औँ स्थानमा रहेका कारण शीर्ष ३२ भित्र पर्दै ‘सीडेड’ अर्थात वरीयता प्राप्त बन्न झिनो अन्तरले चुकेका फेरीका लागि पहिलो खेलमै प्रतिभाशाली अल राउन्डर मुसेटीसँग भिड्नु दुर्भाग्यपूर्ण बन्यो।
वर्षाका कारण ढिलाइ भएपछि निकै गर्मी र आर्द्रतापूर्ण वातावरणमा युएस ओपनको तेस्रो ठूलो कोर्ट ‘ग्रान्ड स्ट्यान्ड’ मा खेलिएको उक्त प्रतिस्पर्धामा मुसेटीले फेरीलाई ६–३, ६–३, ७–५ को नतिजामा पछाडि पारे। चोटका कारण पछिल्ला दुई ‘मेजर’ प्रतियोगिता गुमाएका मुसेटीले तेस्रो सेटमा लगातार दुई पटक फेरीको ‘सर्भिस ब्रेक’ गर्दै जित सुनिश्चित गरे।
खेलका क्रममा एकाग्रता कायम राख्न विम्बल्डनमा जस्तै ‘इयर प्लग’ प्रयोग गरेका फेरी विरुद्ध मुसेटी मैदानमा निकै संयमित र घातक देखिए। सही अवसरको पर्खाइमा रहँदै कम गल्ती गरेका मुसेटीले अन्ततः दोस्रो चरणमा आफ्नो स्थान पक्का गरे।
मुसेटीले आफ्नो विविध शैलीको खेललाई “क्लासिक” (पुरानो शैलीको उत्कृष्ट) भनेका छन्; यसको मुख्य कारण उनको प्रभावशाली र विशिष्ट ‘वान-ह्यान्डेड ब्याकह्यान्ड’ (एक हातले खेलिने ब्याकह्यान्ड) हो, जसले फेरीलाई पटक-पटक समस्यामा पारेको थियो।
तर, दुई घण्टा लामो प्रतिस्पर्धाका क्रममा बेलायती खेलाडी फेरीले आफ्नो सिर्जनात्मक खेलमार्फत दर्शकलाई मन्त्रमुग्ध पारे। विशेष गरी ‘नेट’ (जाली) नजिक देखाएको सुरुवाती प्रभावकारिताले उनले मुसेटीलाई निकै अप्ठ्यारोमा पारेका थिए।
यद्यपि, आशाजनक सुरुवातका बाबजुद फेरीले लगातार दुईवटा ‘डबल फल्ट’ गर्दै आफ्ना प्रतिद्वन्द्वीलाई खेलमा अग्रता लिने मौका दिए र त्यसपछि पुनः आफ्नो ‘सर्भ’ गुमाउँदै पहिलो सेट पनि हारे।
