नेपालब्रिटेन संवाददाता
लण्डन । भोटेकोशी नदीमा आएको बाढीबाट प्रभावितहरूका लागि राहत सामग्री लिएर नेपाल पुगेको गैरआवासीय नेपाली संघ (एनआरएनए) को टोली त्रिशूली अस्पताल पुग्न नसकी चौताराबाटै फर्किएको छ।
एनआरएनए अध्यक्ष डा. हेमराज शर्माका अनुसार नुवाकोटको कोशी खोला–चौतारा टोल हुँदै त्रिशूली अस्पताल पुग्ने टोलीको प्रयास सडकको दयनीय अवस्थाका कारण सफल हुन सकेन।
“राहत सामग्री लिएर हिँडेका गाडीहरू बाटोमै फसेका छन्। केही गाडी बिग्रिएका छन् भने कतिपय ठाउँमा बाटोसमेत नखुलेको अवस्था छ,” डा. शर्माले बताएका छन्।
टोलीले अब धादिङको सुनौलो बजार हुँदै त्रिशूली अस्पताल पुग्ने वैकल्पिक मार्गबाट राहत सामग्री पुर्याउने प्रयास जारी राखेको छ। फर्किने क्रममा समेत विभिन्न स्थानमा सडक अवरुद्ध भएको जनाइएको छ। रुखले बाटो छेकेपछि टोलीले आफैं बाटो खुलाउँदै अघि बढेको डा. शर्माले बताएका छन्।
उनले विपद्का बेला राहत तथा उद्धारमा खटिने टोलीलाई सहज आवतजावतका लागि सडकको अवस्थाबारे स्थानीय निकायले नियमित र यथार्थ सूचना उपलब्ध गराउनुपर्ने आवश्यकता औंल्याएका छन्।
“बाटोको अवस्थाबारे स्थानीय निकायले नियमित रूपमा जानकारी दिने व्यवस्था मिलाउन जरुरी छ। सम्बन्धित निकायको ध्यान जाओस्,” डा. शर्माले भनेका छन्।
बाढी तथा पहिरो प्रभावित क्षेत्रमा राहत सामग्री पुर्याउने क्रममा सडक अवरुद्ध हुँदा उद्धार तथा राहत अभियान प्रभावित बनेको एनआरएनए टोलीले जनाएको छ।
