काठमाडौँ । नेपाली काँग्रेसको १५औँ महाधिवेशनको उद्घाटन दुई दिन पछि सरेको छ। यसअघि असोज १६ गतेदेखि सुरु हुने भनिएको महाधिवेशन अब असोज १८ गतेदेखि हुने भएको हो।

काँग्रेसले महाधिवेशनको उद्घाटन समारोह असोज १८ गते दिउँसो २ बजे काठमाडौँको खुलामञ्चमा गर्ने जनाएको छ। काँग्रेस केन्द्रीय कार्यालयका कार्यवाहक मुख्यसचिव कृष्णप्रसाद दुलालले विज्ञप्ति जारी गर्दै महाधिवेशनको नयाँ मिति सार्वजनिक गरेका हुन्।

काँग्रेसका अनुसार १५औँ महाधिवेशनअन्तर्गत वडा, गाउँपालिका र नगरपालिका तहका अधिवेशन सम्पन्न भइसकेका छन्। हाल प्रदेशसभा क्षेत्रीय तथा प्रतिनिधिसभा क्षेत्रीय अधिवेशनको प्रक्रिया चलिरहेको छ।

देशका विभिन्न स्थानमा परेको भारी वर्षाका कारण केही निर्वाचन क्षेत्रमा क्षेत्रीय अधिवेशन तथा महाधिवेशन प्रतिनिधि चयन प्रक्रिया निर्धारित समयमा सम्पन्न हुन नसकेको काँग्रेसले जनाएको छ।

निर्वाचन समिति तथा पार्टीका सम्बन्धित तहका कार्यसमितिबाट केही क्षेत्रमा अधिवेशन र प्रतिनिधि चयन प्रक्रिया जारी रहेको जानकारी प्राप्त भएपछि विद्यमान परिस्थितिलाई ध्यानमा राख्दै महाधिवेशनको उद्घाटन मिति दुई दिन पछि सारिएको काँग्रेसले जनाएको छ।

अब असोज १८ गते खुलामञ्चमा हुने उद्घाटन समारोहसँगै काँग्रेसको १५औँ महाधिवेशन औपचारिक रूपमा अघि बढ्नेछ।