ताजा खबर

‘प्रधानन्त्रीले विप्लप समूहसँग एकै लहरमा राखेर प्रतिबन्ध लाउने सांकेतिक रुपमा धम्की दिनुभयो: पशुपति

सुर्खेत । राष्ट्रिय प्रजातन्त्र पार्टी (संयुक्त) का अध्यक्षद्वय पशुपति शमशेर जबरा र डा. प्रकाशचन्द्र लोहनीले संविधानले दिएको अधिकार प्रयोग गर्दै संवैधानिक राजसंस्था र सनातन हिन्दु राष्ट्र पूर्नस्थापना गर्न जनतामा जाने बताएका छन् ।

‘प्रधानन्त्रीले विप्लप समूहसँग एकै लहरमा राखेर प्रतिबन्ध लाउने सांकेतिक रुपमा धम्की दिनुभयो, सक्नुहुन्छ भने कारवाही गरेर देखाउन हामी चुनौति दिन्छौं,’ अध्यक्ष राणाले भने ।

‘राष्ट्रियता, परम्परा, धर्म, सँस्कृतिको गौरव संरक्षण गर्दै प्रगति हासिल गर्ने राप्रपा (संयुक्त) को लक्ष्य हो । यसका लागि संविधान प्रदत्त मौलिक हक प्रयोग गरिरहने छौं । आवश्यक परे आन्दोलन पनि गर्छौं,’ सुर्खेतमा आयोजित पत्रकार सम्मलेनलाई सम्बोधन गर्दै राणाले भने ।

‘संविधानको कुनै दफा परिवर्तन हुनुपर्छ भन्न पाउने छुट संविधानले नै दिएको छ । सोही संवैधानिक अधिकार प्रयोग गर्दा प्रधानमन्त्रीले हामीलाई निमिट्यान्न पार्ने धम्की दिएका छन् । बुद्धिजीवीलाई थला पार्छु भन्ने प्रधानमन्त्रीले निमिट्यान्न पार्ने कुरा गरे पनि हामी पछि हट्दैनौ,’ अध्यक्ष लोहनीले भने ।

‘अरुलाई थला पार्ने होइन बास्तवमा नेकपा सरकारले देशलाई नै थला पारेको छ । देश भ्रष्टाचारको दलदलमा फसेको छ । विकास बजेट १५, २० प्रतिशत भन्दा बढी खर्च हुन सकेको छैन । राष्ट्रिय पूँजी र श्रोतमा सानो समूहको हालिमुहाली छ । राष्ट्रको नभएर दलको, दलभित्रको गुटको मात्र यो सरकारले पृष्ठपोषण गरेको छ । सरकारले कुशासन मात्र थोपरेको छ,’ लोहनीले भने ।

नाटकीय परिवर्तन गर्ने जिम्मेवारी पाएको सरकार भ्रष्टाचारले डुङडुङ गनाएको राणाले बताए । वाइड बडी प्रकरणमा सरकारले सर्वदलीय सहमति नै कायम गर्यो । ‘बुढी गण्डकी परियोजनामा बिना टेण्डर ठेक्का दिएर सरकारले व्यापक अनियमितता गर्यो । मेलम्चीको हकमा त बर्खास्त भएको सम्बन्धित सविचले पत्रकार सम्मेलन गरेरै सबै कुरा प्रष्ट पारे । त्यहाँ पनि कमीसनकै चक्कर हो,’ राणाले भने ।

राणाले ८१ प्रतिशत हिन्दु, ९४ प्रतिशत ओमकार परिवार भएको देशमा धर्मनिरपेक्षको व्यवस्था अन्यायपूर्ण भएको धारणा राखे ।

लोहनी भने, यति मात्र होइन, राष्ट्रपतिले राष्ट्रको नभएर दल र गुट विशेषको पक्षमा काम गर्नाले प्रजातन्त्रको विकासमा आघात पुर्याएको छ । ‘यसैले सनातन हिन्दु राष्ट्रका साथै कुनै पनि दलसँग आवद्ध नभएको, सबैलाई स्वीकार्य हुने साझा संस्थाको रुपमा राजसंस्था पूर्नस्थापना गर्नुपर्दछ भन्ने हाम्रो ठहर हो ।’

About the author
nepalbritain news

nepalbritain news