एनआरएन उपाध्यक्ष कुमार पन्त सहितको टोली प्रभावित क्षेत्रमा (फोटो फिचर)

काठमाडौं– आइतबार साँझ आएको विनाशकारी आँधीका कारण प्रभावित भएकाहरुको परिवारलाई राहत वितरण गर्न गैरआवासिय नेपाली संघ (एनआरएन) ले सक्रियता थालेको छ ।

संघका संस्थापक अध्यक्ष डा उपेन्द्र महतो आफ्नो मेडिसिटीको हेलीकप्टर सहित प्रभावित क्षेत्रमा छन् ।
यस्तै उपाध्यक्ष कुमार पन्त, सल्लाहकार रामेश्वर शाह, रतन झा सहितको टोलीले पनि राहत सामग्री वितरणको काम थालेको छ ।
पन्तका अनुसार टोलीले प्रदेश सरकारको सहमतिमा ५ सय धुरीलाई राहत वितरण गरेको छ ।
प्रदेश २ का मुख्यमन्त्री लालबाबू राउतको सल्लाहमा बाराको फेटास्थित पुरिया गाउँका ५०० घर धुरीलाई २५ किलो चामल, ५ किलो आलु, २ किलो दाल र १ लिटर तेल बितरण आजदेखि सुरु गरिएको पन्तले बताए ।

यता महतो पनि नेपाल मेडिसिटी अस्पतालका चिकित्सकको टोली लिएर सोमबार अपरान्ह बारा पुगिसकेका छन् ।

हावा हुरीबाट घाइतेको उपचारमा सहयोगका लागि नेपाल मेडिसिटी अस्पतालका चिकित्सकको टोली औषधी र उपकरणसहित बारा पुगको हो ।
आँधीबाट २७ जनाको मृत्यु हुनुका साथै ४०० बढी घाइते र हजारौं प्रभावित बनेका छन् ।