कोरोनाबाट मृत्यु हुनेको संख्या १६ हजार नाघ्यो, बेलायतमा मर्नेको संख्या ३३५ पुग्यो

लन्डन। विश्व स्वास्थ्य संगठनले (डब्ल्यूएचओ) ले महामारीको रूपमा लिएको कोरोना भाइरस अर्थात् कोभिड १९ को संक्रमणबाट ज्यान गुमाउनेको संख्या १६ हजार नाघेको छ । विभिन्न तथ्याङ्क निकाल्ने संस्था वर्ल्डो मिटर्स डट इन्फोका अनुसार यो समाचार तयार पारिसक्दासम्म विश्वभर कोरोना भाइरसबाट मृत्यु हुनेको संख्या १६ हजार ५१० पुगेको छ ।

अहिलेसम्म विश्वभर ३ लाख ७८ हजार ८४२ सय जना कोरोनाबाट संक्रमित भएका छन् । सङ्क्रमितमध्ये १ लाख २ हजार ६४ निको भइससेका छन् । अहिले २ लाख ६० हजार २६८ जनामा कोरोना भाइरस सक्रिय देखिएको छ । तीमध्ये १२ हजार ६२ जना भने गम्भीर अवस्थामा छन् ।

एकैदिन १८ सय बढीको मृत्यु
सोमबार मात्रै विश्मा १ हजार ८६९ जनाको मृत्यु भएको छ भने ४१ हजार ३५३ जना नयाँ संक्रमित भेटिएका छन् । सोमबार कोरोना भाइरसबाट सबैभन्दा बढीको मृत्यु इटाली, स्पेन, अमेरिका र फ्रान्समा भएको थियो । इटालीमा ६ सय १, स्पेनमा ५ सय ३९, अमेरिकामा १४० र फ्रान्समा १८६ जनाको मृत्यु भएको थियो।

त्यस्तै जर्मनीमा २९, दक्षिण कोरियामा ७, स्वीजरल्याण्डमा २२, बेलायतमा ५४, नेदरल्याण्ड्समा ३४, अष्ट्रियामा ५, पोर्चुगलमा ९, टर्कीमा ७, डेनमार्कमा ११, फिलिपिन्समा ८ जनाको मृत्यु सोमबार भएको थियो।

कुन देशमा कतिको मृत्यु, कति संक्रमित

बेलायत
बेलायत कोरोना भाइरसका संक्रमण हुने देशको दशौँ नम्बरमा पर्छ । अहिलेसम्म बेलायतमा ६ हजार ६५० जनामा कोरोनाबाट संक्रमित भएका छन् । ३३५ जनाले ज्यान गुमाएका छन् । १३५ जना भने पूर्ण रूपमा निको भएका छन् ।

पछिल्लो २४ घण्टामा बेलायतमा ९६७ जनामा कोरोनाको संक्रमण भएको छ । ५४ जनाको मृत्यु । अहिले बेलायतमा ६ हजार १८० संक्रमित छन् । तीमध्ये २० जनाको अवस्था गम्भीर रहेको छ । गत डिसेम्बरको अन्तिमतिर चीनको वुहानबाट फैलिएको यो भाइरस अहिले विश्वका १ सय ९० भन्दा बढी मुलुकमा फैलिसकेको छ ।

इटाली
कोरोनाको उद्गम स्थल चीन भए तापनि पछिल्लो समय युरोपका इटाली, जर्मनी, स्पेन र बेलायतमा भाइरसको संक्रमण र मृतकको संख्या बढिरहेको छ । वर्ल्डो मिटर्स डट इन्फोका अनुसार कोरोना भाइरसबाट सबैभन्दा बढी इटालीमा मृत्यु भएको छ ।

अहिलेसम्म इटालीमा कोरोना भाइरसबाट ६ हजार ७७ जनाले ज्यान गुमाइसकेका छन् भने ६३ हजार ९२७ जना संक्रमित भएका छन् । संक्रमितमध्ये ७ हजार ४३२ जना पूर्ण रुपमा निको भएका छन् । पछिल्लो २४ घण्टामा मात्रै इटालीमा ६०१ जनाको मृत्यु भएको छ भने ४ हजार ७८९ जना नयाँ संक्रमित भेटिएका छन् ।

अहिले इटालीमा ५० हजार ४१८ जना कोरोना संक्रमित छन् । तीमध्ये ३ हजार २०४ जनाको अवस्था गम्भीर रहेको छ । इटालीमा गत बुधबार ४७५, बिहीबार ४२७, शुक्रबार ६२७, शनिबार ७९३ र आइतबार ६५१ जनाको ज्यान गएको थियो ।

चीन
कोरोना भाइरसबाट इटालीपछि सबैभन्दा बढी चीनमा मृत्यु भएको छ । वर्ल्डो मिटर्स डट इन्फोका अनुसार चीन अहिलेसम्म ३ हजार २७० जनाको मृत्यु भएको छ । चीनमा अहिलेसम्म कुल ८१ हजार ९३ जनामा कोरोनाको संक्रमण देखिए पनि अहिले ५ हजार १२० जनामा मात्रै कोरोनाको संक्रमण छ । ७२ हजार ४४० भने पूर्ण रुपमा निको भइसकेका छन् ।

अमेरिका
कोरोना संक्रमित हुनेको तेस्रो नम्बरमा पर्छ अमेरिका, मृत्यु हुनेको संख्याको आधारमा हेर्ने हो भने अमेरिका छैटौँ नम्बरमा देखिन्छ । अहिलेसम्म अमेरिकामा कोरोना भाइरसबाट ५४५ जनाको ज्यान गएको छ भने ४३ हजार ५३७ जना संक्रमित भएका छन् । संक्रमितमध्ये २९५ जना पूर्ण रूपमा निको भएका छन् ।

पछिल्लो २४ घण्टामै अमेरिकामा १३२ जनाको ज्यान गएको छ भने ९ हजार ९७१ जना नयाँ संक्रमित भेटिएका छन् । अहिले अमेरिकामा ४२ हजार ६९७ संक्रमित छन् भने तीमध्ये १ हजार ४० जनाको अवस्था गम्भीर रहेको छ ।

स्पेन
कोरोना भाइरस संक्रमण हुने देशमध्ये चौथो नम्बरमा स्पेन पर्छ । मृतकको संख्याको आधारमा भने स्पेन तेस्रो नम्बरमा छ । अहिलेसम्म स्पेनमा कोरोना भाइरसबाट २ हजार ३११ जनाको ज्यान गएको छ । ३५ हजार १३६ जना संक्रमित भएका छन् । संक्रमितमध्ये ३ हजार ३५५ जना पूर्ण रूपमा निको भएका छन् ।

पछिल्लो २४ घण्टामा स्पेनमा ५३९ जनाको ज्यान गएको छ भने ६ हजार ३६८ जना नयाँ संक्रमित भेटिएका छन् । अहिले स्पेनमा २९ हजार ४७० संक्रमित छन्, तीमध्ये २ हजार ३५५ जनाको अवस्था गम्भीर रहेको छ ।

जर्मनी
कोरोना भाइरसका संक्रमण हुनेको पाँचौँ नम्बरमा जर्मनी पर्छ । तर अरू देशको तुलनामा मर्नेको संख्या भने निकै कम नै देखिन्छ । अहिलेसम्म जर्मनीमा कोरोना भाइरसबाट २९ हजार ५६ जना संक्रमित भएका छन् भने १२३ जनाको ज्यान गएको छ । संक्रमितमध्ये ४५३ जना पूर्ण रूपमा निको भएका छन् ।

पछिल्लो २४ घण्टामा जर्मनीमा कोरोनाका कारण २९ जनाको ज्यान गएको छ भने ४ हजार १८३ जना नयाँ संक्रमित भेटिएका छन् । अहिले जर्मनीमा २८ हजार ४८० संक्रमित छन् भने तीमध्ये २३ जनाको अवस्था गम्भीर रहेको छ ।

इरान
कोरोना भाइरसका संक्रमण हुनेको छटौँ नम्बरमा पर्छ इरान । तर मृत्यु हुनेमा भने चौथो नम्बरमा पर्छ । अहिलेसम्म इरानमा कोरोना भाइरसबाट १ हजार ८१२ जनाको ज्यान गएको छ । २३ हजार ४९ जना संक्रमित भएका छन् भने ८ हजार ३७६ जना पूर्ण रूपमा निको भएका छन् ।

फ्रान्स
कोरोना भाइरसका संक्रमण हुनेको सातौँ नम्बरमा पर्छ फ्रान्स । अहिलेसम्म फ्रान्स कोरोना भाइरसबाट ८६० जनाको ज्यान गएको छ । १९ हजार ८५६ जना संक्रमित भएका छन् भने २ हजार २ सय जना पूर्ण रूपमा निको भएका छन् ।

पछिल्लो २४ घण्टामा फ्रान्समा कोरोनाका कारण १८५ जनाको ज्यान गएको छ भने ३ हजार ८३८ जना नयाँ संक्रमित भेटिएका छन् । अहिले फ्रान्समा १६ हजार ७९६ संक्रमित छन् । तीमध्ये २ हजार ८२ जनाको अवस्था भने गम्भीर रहेको छ ।

दक्षिण कोरिया
दक्षिण कोरिया कोरोना भाइरसका संक्रमण हुने देशको आठौं नम्बरमा पर्छ । अहिलेसम्म दक्षिण कोरियामा ८ हजार ९६१ जनामा संक्रमण भएको छ भने १११ जनाको मृत्यु भएको छ । ३ हजार १६६ जना पूर्ण रूपमा निको भएका छन् ।

पछिल्लो २४ घण्टामा दक्षिण कोरियामा कोरोनाका कारण ७ जनाको ज्यान गुमाएका छन् । ६४ जनामा थप संक्रमण भेटिएको छ । अहिले दक्षिण कोरियामा ५ हजार ६८४ संक्रमित छन् । तीमध्ये ५९ जनाको अवस्था भने गम्भीर रहेको छ ।

स्वीजरल्याण्ड
कोरोना भाइरसका संक्रमण हुनेको नवौं नम्बरमा पर्छ स्वीजरल्याण्ड । अहिलेसम्म स्वीजरल्याण्डमा कोरोना भाइरसबाट ८ हजार ७९५ जना संक्रमित भएका छन् भने १२० जनाले ज्यान गुमाएका छन् । जना पूर्ण रूपमा निको भएका छन् ।

पछिल्लो २४ घण्टामा स्वीजरल्याण्डमा १ हजार ३२१ जनामा कोरोनाको संक्रमण भएको छ भने २२ जनाको मृत्यु भएको छ । अहिले स्वीजरल्याण्डमा ८ हजार ५४४ संक्रमित छन् । तीमध्ये १४१ जनाको अवस्था गम्भीर रहेको छ ।