१३ बैशाख २०८१, बिहीबार
Follow Us

०८४ को निर्वाचनमा रास्वपाले बहुमत मात्र होईन, दुई तिहाइ ल्याउँछ: सभापति लामिछाने

नेपालब्रिटेन संवाददाता
२० माघ २०८०, शनिबार १३:१४

काठमाडौं । पूर्व गृहमन्त्री एवं राष्ट्रिय स्वतन्त्र पार्टीका सभापति रवि लामिछानेले नेपालमा राम्ररी अनुसन्धान गर्ने हो भने अहिलेका अधिकांश नेता जेल पर्ने दाबी गरेका छन ।

आज (शनिबार )अर्घाखाँचीको सन्धिखर्कमा पार्टीले गरेको आमसभालाई सम्बोधन गर्दै सभापति लामिछानेले यस्तो बताएका हुन । उनले अहिले सेटिङ मिलाउन नसक्नेहरुमात्रै जेल गएको बताएका छन । उनले भने, ‘छातीमा आँट भएको मान्छेले अनुसन्धान गर्ने हो भने औंलामा गन्न मिल्ने नेता पनि बच्दैनन् यो देशमा म तपाईंलाई ग्यारेन्टीका साथ भन्न चाहन्छु’ ।

उनले पुराना दलहरुबाट देश परिवर्तन होला भनेर वर्षौंदेखि कुरे पनि उनीहरु भागबन्डा र सेटिङमा लागेकाले जनताले विकल्प खोजेको बताएका छन । उनले अब हुने चुनावमा रास्वपालाई वहुमत दिएमा देशलाई एक नम्बर बनाउने दावी गर्दै उनले बनाउन नसके राजनीति नगर्ने बताए । उनले अहिलेको सरकार भ्रष्ट र बेथितिको चाङ बोकेको हुंदा पुरै कार्यकालसम्म बोक्ने कि नबोक्ने भन्ने प्रश्न उठेकाले जुनसुकै बेला हुने चुनावमा बहुमत पाउने गरी पार्टी अघि बढेको बताएका छन ।

उनले भने, ‘हामी र्‍याल सिंगान चुहिन्जेल राजनीति गर्दैनौं, अब एक कार्यकाल एक्लै बहुमतका लागि जनतालाई अपिल गर्छौं, बहुमत पाएर पनि देशमा सुशासन र परिवर्तन दिन नसके राजनीति गर्दैनौं’, ‘दुई कार्यकाल मात्र राजनीति गर्ने हो ।’ नक्कली भुटानी शरणार्थी प्रकरणमा अर्घाखाँचीबाट निर्वाचित सांसद तथा एमालेका सचिव टोपबहादुर रायमाझी पुर्पक्षका लागि थुनामा रहेका कारण निलम्बित अवस्थामा छन् । लामिछानेले अहिले अर्घाखाँची जनप्रतिनिधिविहीन भएको टिप्पणी गर्दै यो जिल्लाको आवाज पनि आफ्नो पार्टीले संसदमा उठाउने बताएका छन ।

उनले गएको निर्वाचनमा आफू र आफ्नो दलविरुद्ध सत्ता गठबन्धन नै लागेपनि ५ महिनाको छोटो अवधिमै चौथो शक्ति भएको भन्दै लामिछानेले अबको चुनावमा पहिलो शक्ति बन्ने बताएका छन । अहिलेको सरकारले विभिन्न भ्रष्टाचार र अनियमितताका काण्डमा सुरूसुरूमा काम गरेजस्तो गर्ने तर टुंगो नलाग्दै राजनीतिक दबाबमा ढाकछोप गरेको उनको आरोप लगाएका छन ।

उनले राजनीतिमा अब युवा हस्तक्षेपको आवश्यकता रहेको भन्दै उनले इमान्दारको हातमा राजनीति जानुपर्ने आफ्नो पार्टीको मान्यता रहेको बताएका छन ।