नेपालब्रिटेन संवाददाता
काठमाडौं । नेकपा एकीकृत समाजवादी पनि सरकारमा सहभागी भएपछि प्रधानमन्त्री पुष्पकमल दाहाल प्रचण्डले विश्वासको मत पाउने पक्का भएको छ ।
नयाँ सत्ता समीकरणमा रहेका एमालेसँग ७८, माओवादी केन्द्रसँग ३२, राष्ट्रिय स्वतन्त्र पार्टी (रास्वपा) सँग २१, जनता समाजवादी पार्टी (जसपा) सँग १२ र एकीकृत समाजवादीसँग १० सिट रहेको छ । यि दलहरुको सांसद संख्या १५३ पुगेको छ ।
नेकपा (माओवादी केन्द्र), नेकपा (एमाले), राष्ट्रिय स्वतन्त्र पार्टी (रास्वपा) र नेकपा (एकीकृत समाजवादी) सरकारमा सहभागी भएका छन् । चार दलीय गठबन्धनको ८ बुँदे सहमतिपत्रमा हस्ताक्षर गरे पनि जनता समाजवादी पार्टी बिस्तारित मन्त्रिपरिषदमा सहभागी भइसकेको छैन ।
तर ८ बुँदे सहमतिमा हस्ताक्षर नगरेको माधव नेपाल नेतृत्वको नेकपा (एकीकृत समाजवादी) भने दुईवटा मन्त्रालय लिएर सरकारमा सहभागी भएको छ । गत वर्षको पुस १० को समीकरणमा रहेका राप्रपाको ठाउँमा यसपटक एकीकृत समाजवादी प्रवेश गरेको छ । यसअघि सरकारमै रहेका जनमत, नाउपा र लोसपाले भने अहिलेसम्म कुनै प्रष्ट निर्णय गरिसकेका छैनन् ।
सत्ता समीकरण बदलिएपछि विस्तार भएको प्रचण्ड मन्त्रिपरिषद्मा चार जना महिला मन्त्री बनेका छन् । एमालेबाट दुई, माओवादी र रास्वपा बाट एक-एक जना महिलाले मन्त्री बन्ने अवसर पाएका हुन् । २० सदस्यीय मन्त्रिपरिषद् विस्तार हुँदा तीन जना उपप्रधानमन्त्री बनेका छन् ।
तीन उपप्रधानमन्त्रीमा एमालेका रघुवीर महासेठ पहिलो वरियतामा छन् । त्यसपछिको वरियतामा नारायणकाजी श्रेष्ठ र रवि लामिछानेलाई राखिएको छ । एमालेले उपप्रधानसहित ८ वटा मन्त्रालय पाएको छ ।
माओवादीले प्रधानमन्त्री र उपप्रधानमन्त्रीसहित ६ वटा मन्त्रालय राखेको छ । रास्वपाले उपप्रधान तथा गृहमन्त्रीसहित ४ मन्त्रालय लिँदा नेकपा (एस) ले भने २ मन्त्रालय पाएको छ ।
