लण्डन । बेलायतबाट सञ्चालित नेपालब्रिटेन डट कमले बेलायतका लागि नेपाली कार्यवाहक राजदूत रोशन खनाललाई उत्कृष्ट कूटनीतिज्ञको उपाधिले सम्मान गरेको छ ।

उनलाई नेपालब्रिटेन डट कमको १७ औं वार्षिकोत्सवको अवसर पारेर गैरआवासीय नेपाली संघका अध्यक्ष डा. बद्री केसी र नेपालब्रिटेन डट कमका अध्यक्ष चिरञ्जीवी ढकालले गत आइतबार सम्मान गरेका हुन् ।
नेपाली दूतावास लन्डनमा विगत ४ वर्षको कार्यकालमा उनले नियोग उपप्रमुख एवं प्रवक्ताको जिम्मेवारी सम्हाल्दा नेपाल र बेलायतबीचको मैत्रीपूर्ण सम्बन्धमा महत्त्वपूर्ण भूमिका निर्वाह गरेवापत सो सम्मान प्रदान गरिएको हो ।

उनले यसअघि लण्डनस्थित नेपाली दूतावासमा कार्यवाहक राजदूतको जिम्मेवारी पनि सम्हालेकी थिइन् । कडा प्रतिस्पर्धापछि मात्रै प्रवेश पाइने नेपालको परराष्ट्र सेवामा एक दशकभन्दा बढी समय बिताइसकेकी खनालले यसअघि मन्त्रालयमा उत्तरपूर्वी एसिया डेस्क सम्हाल्दै आएकी थिइन् । पाल्पा जिल्लामा जन्मिएकी खनाल कपिलवस्तु हुँदै हाल काठमाडौंमा बसोवास गर्दै आएकी छन् ।

शाखा अधिकृतबाट सरकारी सेवा सुरु गरेकी खनालले इजरायलस्थित नेपाली दूतावासमा प्रथम सचिवको रुपमा चार वर्षे कार्यकाल सम्पन्न गरिसकेकी छन् । सरल स्वभावकी खनाल बेलायतमा एक मिलनसार तथा मेहनती करियर डिप्लोम्याटको रुपमा चिनिन्छन् ।