काठमाडौँ । त्रिभुवन अन्तर्राष्ट्रिय विमानस्थलमा एक सरसफाइ कर्मचारी सुनसहित पक्राउ परेका छन्। विमानस्थल परिसरमा नियमित सरसफाइका क्रममा संलग्न उक्त व्यक्तिलाई शंकास्पद गतिविधिका आधारमा जाँच गर्दा सुन फेला परेको हो।

विमानस्थल स्रोतका अनुसार मंगलबार बिहान करिब ७:२३ बजे डस्टबिनबाट फोहोर संकलन गर्दै गरेका बेला उनलाई रोकी जाँच गरिएको थियो। स्क्रिनिङ प्रक्रियामा उनको साथबाट करिब ४.४ ग्राम सुन बरामद भएको जनाइएको छ।

नियन्त्रणमा परेका व्यक्ति डिकबहादुर राउत रहेको र उनी सुनगाभा सगरमाथा सर्भिस प्रालिमार्फत विमानस्थलमा सरसफाइ कार्यका लागि खटिएका कर्मचारी भएको पुष्टि भएको छ। फोहोरसँगै डस्टबिनको प्लास्टिक उठाउने क्रममा शंका उत्पन्न भएपछि सुरक्षा निकायले जाँच अघि बढाएको बताइएको छ।

बरामद सुनसहित उनलाई आवश्यक अनुसन्धानका लागि विमानस्थलस्थित भन्सार कार्यालयको जिम्मा लगाइएको थियो। प्रारम्भिक प्रक्रिया पूरा भएपछि राउतलाई तारेखमा छोडिएको र घटनासम्बन्धी थप अनुसन्धान जारी रहेको जनाइएको छ।