काठमाडौं । प्रतिपक्षी दल कांग्रेसका सांसद चन्द्रमोहन यादवले सत्ता घटक दल राष्ट्रिय स्वतन्त्र पार्टी (रास्वपा)का सांसद अमरेशकुमार सिंहको अभिव्यक्तिबारे सरकारसँग स्पष्ट जवाफको माग गरेका छन ।

आज मंगलबार बसेको प्रतिनिधिसभाको बैठकमा बोल्दै सांसद सिंहले गम्भीर कुरा उठाएको भएकाले सरकारले जवाफ दिनुपर्ने पनि बताएका छन । सांसद सिंहले प्रधानमन्त्रीको सचिवालयले सम्पत्ति शुद्धीकरणको डीजीलाई बोलाएर कन्चटमा पेस्तोल तेर्स्याएको आरोप लगाएका थिए ।

उनले भने, ‘सत्ता पक्षकै सांसदबाट आएको वक्तव्यबारे ध्यानाकर्षण गराउन चाहन्छु। कहीँ सुन्नमा आएको छ, कन्चटमै पेस्तोल राखेर थर्काउने कुरा आएको छ ।

कहीँ कुरा आएको छ, प्रश्न गर्दाखेरि धम्की आउँदो रहेछ। यो कुरा असाध्यै अलोकतान्त्रिक कुरा हो। यसमा सरकारको के जवाफ छ, हामी सुन्न आतुर छौँ ।’ लोकतन्त्रमा हिंसाको या भयको कुनै स्थान नहुने पनि बताए ।