काठमाडौं । पाकिस्तानी प्रधान मन्त्री शाहिद खाकन अब्बासी आज दुई दिने नेपाल भ्रमणमा आउँदै हुनुहुन्छ । अब्बासी दिउँसो २ बजेपछि त्रिभुवन अन्तर्राष्ट्रिय विमान स्थल ओर्लिँनु हुनेछ । विमानस्थलमा उहाँलाई अर्थमन्त्री डा. युवराज खतिवडाले स्वागत गर्नु हुने बताइएको छ ।

उहाँ प्रधानमन्त्री केपी शर्मा ओलीलाई बधाई दिन नेपाल आउन लाग्नु भएको हो । उहाँको भ्रमणलाई राजकीय भ्रमण भनिएको छ । पहिले अन्तर्राष्ट्रिय विमानस्थलमै सम्मान दिने गरिएकोमा यो पल्ट पाहुनालाई विमानस्थलबाट भित्र्याइसकेर ‘गार्ड अफ अनर’ दिइने भएको छ । नयाँ संविधान अनुरुप गठित नयाँ सरकारले पाकिस्तानी प्रधानमन्त्रीको भ्रमणबाटै सम्मानको परम्परा फेर्न लागेको हो ।

पाकिस्तानी प्रधानमन्त्री अब्बासीलाई सैनिक मञ्च टुँडिखेलमा बेलुकी ५ बजे ‘गार्ड अफ अनर’ दिइने छ । नेपाली सेनाको टुकडीले उहाँलाई सैनिकमञ्चमा सलामी अर्पण गर्ने छ ।

सैनिक मञ्च टुँडिखेलमा ‘गार्ड अफ अनर’ दिएपछि अब्बासी र प्रधानमन्त्री ओलीबीच बालुवाटारमा भेट हुनेछ । भेटमा दुई देशको सम्बन्ध, सार्कको स्थगित सम्मेलन र विकासका क्षेत्रमा हुनसक्ने साझेदारीबारे छलफल हुने बताइएको छ । आज साँझ प्रधानमन्त्री ओलीले अब्बासीको सम्मानमा रात्रीभोज आयोजना गर्नुहुनेछ । पाकिस्तान फर्किने दिन भोलि बिहान ९ बजे अब्बासीले शितल निवासमा पुगेर राष्ट्रपति विद्यादेवी भण्डारीसँग शिष्टाचार भेट गर्नु हुनेछ । अब्बासी भोलि नै मध्यान्ह स्वदेश फर्किनु हुनेछ ।