नेपालब्रिटेन संवाददाता
काठमाडौं । नेकपा (माओवादी केन्द्र)ले आफ्नो दल छाडेका स्थानीय तहका जनप्रतिनिधि र केन्द्रीय सदस्यहरुलाई पार्टीबाट निष्कासन गर्ने निर्णय गरेको छ ।
सोमबार भर्चुअल बैठक गर्दै माओवादी केन्द्रीय समितिको आकस्मिक बैठकले पार्टी अनुशासन उल्लङ्घन गर्नेहरुलाई निष्कासन गर्ने निर्णयलाई औपचारिकता दिएको हो ।
यसअघि दल त्याग गर्नेहरुलाई कारबाही गर्ने अधिकार अध्यक्ष पुष्पकमल दाहाल‘प्रचण्ड’लाई दिएपनि त्यसरी गरिएको कारबाहीलाई निर्वाचन आयोगले मान्यता नदिएपछि केन्द्रीय समितिले नै कारबाहीको निर्णय गरेको हो ।
पार्टी त्यागेका स्थानीय तहका जनप्रतिनिधि र केन्द्रीय सदस्यहरुलाई पार्टीबाट निष्कासन गर्ने निर्णयलाई औपचारिकता दिइएको नेताहरुको भनाइ छ । बैठकमा अध्यक्ष प्रचण्डले विकसित राजनीतिक घटनाक्रमबारे जानकारी गराएका थिए ।
कारबाहीमा स्थानीय तहका १८ सहित केन्द्रीय समितिका केही नेता परेका छन् ।
