बागलुङ । छोरी बचाऊ अभियान अन्तर्गत ‘नगरकी छोरी’ कार्यक्रम यहाँ प्रभावकारी हुँदै गएको छ। यो कार्यक्रमलाई कार्यान्वयन गरिरहेको बागलुङ नगरपालिकाले दुई वर्षको अवधिमा १६८ जना छोरीको खातामा आठ लाख ४० हजार रुपियाँ जम्मा गरेको छ।

गर्भ परीक्षण गरेर छोरी भए भ्रूण हत्या गर्ने प्रवृत्ति अन्त्य गर्न नगरपालिकाले यस्तो नीति लिएको छ। ‘नगरकी छोरी’ कार्यक्रम अन्तर्गत छोरी जन्मनेबित्तिकै पाँच हजार रुपियाँको मुद्दती खाता खोलिदिने व्यवस्था गरिएको छ।

अभिभावकले चाहे रकम थप गर्न सक्ने र कम्तीमा २० वर्ष झिक्न नमिल्ने गरी कार्यविधि बनेको छ। अहिले जन्मेकी छोरीले उमेर पुग्दा राम्रो बचत गर्न सक्ने छिन्। २०८० साउनदेखि नगरमा जन्मेका सबै छोरीको २० बर्से अवधिको मुद्दती खाता खोलिएको नगरप्रमुख वसन्त श्रेष्ठले बताए।