नेपालब्रिटेन संवाददाता
काठमाडौं । राष्ट्रपति रामचन्द्र पौडेलले जेन–जी आन्दोलनपछि उत्पन्न परिस्थितिमा प्रतिनिधिसभाबाट मन्त्रिपरिषद् गठन गर्ने कुनै उपाय बाँकी नरहेको बताएका छन । आज (शुक्रबार) संविधान दिवसको अवसरमा राष्ट्रपति कार्यालयले आयोजना गरेको चियापान समारोहलाई सम्बोधन गर्दै राष्ट्रपति पौडेलले यस्तो बताएका हुन ।
उनले अहिलेको अन्तरिम सरकार आम सहमतिको आधारमा बनाएको खुलासा गरेका हुन । राष्ट्रपति पौडेलले भने, ‘प्रतिनिधिसभाबाट मन्त्रिमण्डल गठन गर्ने कुनै उपाय नभएकोले आम सहमतिबाट यो कदम चालिएको कुरा सबैले बुझौं ‘६ महिनाभित्र प्रतिनिधिसभा ल्याउने चुनाव सम्पन्न गर्न सबै जागौं ।’ राष्ट्रपति पौडेलले नयाँ जनादेशले लोकतन्त्रलाई थप संस्थागत गर्ने विश्वास व्यक्त गरेका छन ।
‘नयाँ जनादेशले लोकतन्त्रलाई थप संस्थागत गर्दै मुलुकको आगामी बाटो तय गर्नेछ भन्ने मेरो दृढ विश्वास छ’ उनले भने, ‘अहिले बनेको अन्तरिम सरकारले राष्ट्रिय क्षतिको पुनर्निर्माण गर्दै ६ महिनामा निर्वाचन सम्पन्न गरी जनप्रतिनिधिमूलक संस्थालाई सत्ता हस्तान्तरण गर्नेछ ।’ समयमा निर्वाचन सम्पन्न गर्नु सबै नेपालीको अहिलेको मुख्य कार्यभार रहेकोमा उनले जोड दिए ।
उनले भने, ‘यो घडीमा म सबै राजनीतिक दल, मुलुकको शासन तथा व्यवस्थापनमा आबद्ध निकाय, बौद्धिक समुदाय र नागरिक समाजलाई असमझदारी र द्वन्द्वरहित भएर सहमति र सहकार्यका साथ निर्वाचनको सफलताको लागि क्रियाशील हुन आह्वान गर्दछु ।’
उनले राष्ट्रको अभिभावकको रूपमा भूमिका निर्वाह गरिरहेको भन्दै अहिलेको अप्ठ्यारो स्थितिबाट पार लगाउन सबै मिलेर काम गर्नुपर्ने बताए । ‘नवपुस्ताको र जनचाहना अनुसार तत्कालीन समयमा जे जति गर्न सकिन्थ्यो हामी सबैले मिलेर गरेका छौं’ उनले भने, ‘मुलुक फेरि एकपटक परिवर्तनको नवमार्गमा प्रवेश गरेको छ ।’
