नेपालब्रिटेन संवाददाता
काठमाडौँ । नेपाली काँग्रेसका नेता डा. शेखर कोइरालाले पार्टीभित्र सम्भावित विभाजन टार्न आफूले मध्यमार्गी र संयमित भूमिका निर्वाह गरेको बताएका छन्।
बिहीबार मोरङ निर्वाचन क्षेत्र नम्बर ६ अन्तर्गत सुन्दरहरैंचामा आयोजित अगुवा कार्यकर्ता भेटघाट तथा छलफल कार्यक्रममा उनले पार्टीलाई जोगाउने उद्देश्यले शान्त र सौम्य बाटो रोजेको स्पष्ट पारेका छन्। विशेष महाधिवेशनमा सहभागी भए पार्टी फुट्ने जोखिम बढ्न सक्ने आकलनका आधारमा आफूले त्यस्तो निर्णय लिएको उनको भनाइ छ।
कोइरालाले प्रतिनिधि सभा निर्वाचन प्रक्रिया अघि बढिसकेको उल्लेख गर्दै यस निर्वाचनले मुलुकलाई स्पष्ट राजनीतिक दिशानिर्देश प्रदान गर्ने विश्वास व्यक्त गरेका छन्।
कार्यक्रममा उनले जनप्रतिनिधिको हैसियतमा रहँदा नीति निर्माणदेखि सर्वसाधारणको दैनिकी सहज बनाउने कार्यमा आफू केन्द्रित रहेको स्मरण गराएका छन्। जेन जेड आन्दोलन अघि सम्म क्षेत्र र मुलुकको हितलाई प्राथमिकतामा राखेर संसदीय जिम्मेवारी निर्वाह गरेको उनले बताएका छन्।
