अमेरिकी राष्ट्रपति डोनाल्ड ट्रम्पले थप १० दिन इरानी ऊर्जा साइटहरूमा आक्रमण नगर्ने घोषणा गरेका छन् । नयाँ समयसीमा अब अप्रिल ६ को लागि तय गरिएको बीबीसीले जनाएको छ ।

दुई देशहरूबीच जारी वार्तालाई अगाडि बढाउन यो निर्णय गरिएको उनले बताए । सामाजिक सञ्जाल ट्रुथ सोसलमा इरानी सरकारको अनुरोध बमोजिम १० दिन आक्रमणमा रोक लगाएको उनको भनाइ छ ।

यसअघि ट्रम्पले इरानी ऊर्जा साइटहरूमा पाँच दिन आक्रमण नगर्ने घोषणा गरेका थिए, जुन समयसीमा शुक्रबार सकिँदै छ ।

इरानले युद्ध अन्त्यका लागि सम्झौता नगरे आक्रमण जारी राख्ने ह्वाइट हाउसले चेतावनी दिएको छ । इरान वार्तामा नआए अमेरिकाले लगातार आक्रमण गर्ने चेतावनी ट्रम्मले समेत दिएको बीबीसीले जनाएको छ ।

तर इरानी अधिकारीहरूले भने अमेरिकासँग कुनै वार्ता नभएको प्रतिक्रिया दिएका छन् । यसअघि, इरानले अमेरिकाले प्रस्ताव गरेको शान्ति योजना अस्वीकार गरिसकेको छ ।

यसैबीच, अमेरिकाले इरानको खार्ग टापुमा स्थल आक्रमण गर्न सक्ने रिपोर्टहरू आएका छन् । प्रतिक्रियामा, इरानले बाब-एल-मन्डेब जलडमरूम बन्द गर्ने धम्की दिएको छ । बाब-एल-मन्डेब लाल सागरको प्रवेश बिन्दु हो । यसले लाल सागरलाई अरब सागरसँग जोड्छ । यो विश्वको चौथो ठूलो ढुवानी मार्ग हो ।

इरानी विदेशमन्त्री अब्बास अराघचीले होर्मुज जलडमरूममा शत्रु जहाजहरू रोक्नु इरानको कानुनी अधिकार भएको बताए । मिडिया रिपोर्टका अनुसार, संयुक्त राष्ट्रसंघका प्रमुख एन्टोनियो गुटेरेससँगको कुराकानीमा अराघचीले समुद्री मार्गमा बढ्दो असुरक्षा अमेरिका र यहूदी शासनको कार्यको परिणाम भएको बताएका थिए ।