अष्ट्रेलियाको बेरोजगारी दर मार्च महिनामा ४.३ प्रतिशतमा स्थिर रहेको छ । बिहीवार सार्वजनिक गरिएको आधिकारिक तथ्याङ्कअनुसार अर्थशास्त्रीहरूको अनुमान बमोजिम नै यो दर कायम रहेको हो ।

अष्ट्रेलियन ब्युरो अफ स्ट्याटिस्टिक्सकाअनुसार मार्चमा कार्यरत अष्ट्रेलियालीहरूको संख्या १७ हजार ९ सयले बढेको छ भने बेरोजगारहरूको संख्या ३ हजार ७ सयले घटेको छ । यसरी अष्ट्रेलियामा लगातार दोस्रो महिना बेरोजगारी दर ४.३ प्रतिशत कायम भएको छ ।

फेब्रुअरी र मार्चको बीचमा पूर्णकालीन कर्मचारीको संख्या ५२ हजार ५ सयले बढेको छ, जबकि अल्पकालीन रोजगारीमा ३४ हजार ६ सयको गिरावट आएको छ । पूर्णकालीन रोजगारीमा भएको वृद्धिका कारण अष्ट्रेलियालीहरूले गरेको जम्मा कामको घण्टा ०.५ प्रतिशतले बढेर २.०१ अर्ब पुगेको छ ।

यद्यपि, सहभागिता दर, जसले कामकाजी उमेरका जनसंख्यामध्ये कार्यरत वा काम खोजिरहेकाहरूको हिस्सा मापन गर्दछ, फेब्रुअरीको ६६.९ प्रतिशतबाट घटेर मार्चमा ६६.८ प्रतिशत कायम भएको छ ।