नेपालब्रिटेन संवाददाता
दक्षिण अफ्रिकामा एक बेलायती पर्यटकलाई हान्टाभाइरस संक्रमण पुष्टि भएपछि अस्पतालमा उपचार भइरहेको त्यहाँको स्वास्थ्य विभागले जनाएको छ। विभागका अनुसार ती व्यक्ति जहाजमार्फत सेन्ट हेलेना बाट असेन्सन टापु तर्फ यात्रा गर्ने क्रममा बिरामी परेका थिए।
बिरामी परेपछि उनलाई असेन्सन टापुको अस्पतालबाट दक्षिण अफ्रिकाको स्यान्डटन स्थित एक निजी स्वास्थ्य संस्थामा सारिएको थियो। त्यहाँ गरिएको प्रयोगशाला परीक्षणमा उनको नतिजा हान्टाभाइरस पोजिटिभ आएको पुष्टि भएको हो।
यसैबीच, दक्षिण अफ्रिकी स्वास्थ्य विभागले सो घटनासँग सम्बन्धित दुई जनाको मृत्युबारे थप जानकारी सार्वजनिक गरेको छ। पहिलो मृतक ७० वर्षीय पुरुष रहेका छन्, जो उशुआइया बाट सेन्ट हेलेना जाँदै गर्दा अचानक बिरामी परेका थिए। ज्वरो, टाउको दुखाइ, पेट दुखाइ र झाडापखालाजस्ता लक्षण देखिएका उनलाई सेन्ट हेलेना पुगेपछि मृत घोषणा गरिएको थियो।
दोस्रो मृतक ती पुरुषकी ६९ वर्षीया श्रीमती हुन्, जो डच नागरिक थिइन्। उनी दक्षिण अफ्रिकाको ओआर टाम्बो अन्तर्राष्ट्रिय विमानस्थल मा नेदरल्याण्ड फर्किने क्रममा अचानक बेहोस भई ढलेकी थिइन्। उनलाई केम्पटन पार्क नजिकैको स्वास्थ्य संस्थामा लगिएको थियो, जहाँ उपचारकै क्रममा उनको मृत्यु भएको हो।
उक्त जहाज उशुआइया बाट प्रस्थान गरी सेन्ट हेलेना, असेन्सन टापु हुँदै अन्ततः प्राया पुग्ने क्रममा रहेको थियो। यो यात्रा अर्जेन्टिना बाट केप भर्डे तर्फ भइरहेको थियो।
हान्टाभाइरस सामान्यतया मुसा जस्ता कृन्तक जनावरबाट सर्ने भाइरस हो, जसले मानिसमा गम्भीर स्वास्थ्य समस्या निम्त्याउन सक्छ।
